Home » Parlamentario Endy Croes ta reta Parlamentario Richard Arends: “Splica pueblo ken a cobra mas di 1 MIYON florin y ken ta Horizon Consultancy Group”

Parlamentario Endy Croes ta reta Parlamentario Richard Arends: “Splica pueblo ken a cobra mas di 1 MIYON florin y ken ta Horizon Consultancy Group”

by Admin
0 comment 72 views

Parlamentario Endy Croes ta reta Richard Arends pa e bin dilanti y duna cuenta na pueblo si ta berdad cu el a cobra mas di 1 MIYON florin di e pueblo aki. Diabierna ultimo Parlamentarionan tabata tin un deadline te cu 12 pm pa por haci pregunta na Gobierno y pues na tur minister relaciona cu presupuesto 2018. Reunion publico pa trata presupuesto 2018 lo inicia diahuebs awor 18 di April pa 8.30 am segun schedule y lo termina 25 di April. Minister Danqui Oduber y Chris Romero lo ta e prome dos Ministernan cu lo ta den Parlamento diahuebs awor.

Pueblo tin derecho di sa tur cos
Mas cu claro ta e oportunidad pa mira unda tur gobierno a corta y baha gasto y alaves compara cu añanan anterior. Pa logra esaki ta di vital importancia pa Parlamento por ricibi informacion di e gobernacion anterior. Na e mesun momento Parlamentario Croes ta splica cu el a priminti pueblo cu e lo bay ta transparente y cu pueblo tin derecho di sa tur cos. Pueblo tin derecho di sa ta con Mike Eman a maneha su placa di belasting. Pueblo mester por compronde ta con Richard Arends cu Mike Eman a logra crea e “desaster financiero” y pues e “Mega Debe”. Nos a convivi e dolor cu hopi di nos conciudadanonan kendenan a ricibi cobransanan astronomico di belasting bou di e gobernacion di AVP y tin di nan te hasta “In de naam der Koning”. Pero ora mira atras ta con Richard Arends y Mike Eman a maneha e placa di pueblo, e ta duna hende alavez repudio. Bo no por saca wowo di e “homber chikito” of e pensionado hincando bo man den su cartera na un manera cruel pa despues bo ta bira yena bo propio cartera di bo amigonan y compinchinan na un manera sin gevoel.

Tur puito lo wordo saca
Nos tur por corda con Tera Group y Paxi, dos compania di Patrick Paskel amigo di Richard Arends y Mike Eman a wordo privilegia cobrando 8 MIYON na propaganda for di placa di e pueblo. Parlamentario Croes ta amplia riba Richard Arends y ta urgi Richard Arends pa e bin dilanti y splica pueblo di ken Horizon Consultancy Group NV ta y kico tur e compania aki a haci pa e gobierno anterior y cuanto esaki a costa pueblo? Tambe nos kier puntra Richard Arends si e tambe a haya un tereno “prime location” na Malmok for di gobierno sin cana e proceso normal? Richard Arends por splica si e cas construi riba dicho tereno na balor di 500 mil florin ta di dje? Richard tin un deadline te cu diamars 17 di April pa e mes bin dilanti y duna cuenta si ta berdad cu su persona ta liga y/of tabata tin un contracto cu gobierno via Horizon Consultancy y kico ta e trabaonan cu el a haci. Tin informacionnan contudente cu Richard Arends a cobra mas cu 1 MIYON florin y nos lo percura pa haci lo maximo pa informa pueblo debidamente. Richard Arends tambe a forma parti di “Feestvierend ten ondergaan”. Tur puito lo wordo saca durante reunion publico y asina pueblo lo cera conoci den cas di pueblo cu e sinberguensanan cu a destrosa e pais aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio