Cu enfoke riba area di low, high rise y Sasaki weg
ORANJESTAD, Aruba – 18 di maart, 2018: E miembronan di Aruba Hotel and Tourism Association (AHATA) a reuni cu e team di e proyecto Watty Vos Boulevard cual ta consisti di personal di DOW asesora pa esunnan di PwC y esunnan encarga pa ehecuta e proyecto kende ta e contratista Mota – Engil.
E motibo di e reunion aki tabata pa haya splicacion di e acontecimentonan cu lo bay tin y e cambio di ruta, durante e construccion di e rotonde banda di Super Food. E construccion di e rotonde lo ta den man di e compania Mota-Engil, cual ta e compania cu a gana e bid y lo ta encarga pa haci e trabou di construi y mantene ful e proyecto. Esunnan presente a haya un presentacion di e proyecto di Watty Vos Blvd. den su totalidad.
Mota-Engil a proyecta cu e construccion di e rotonde lo tin un duracion di 12 siman pa asina e fluho di trafico por bay mas lihe y cu no tin molester pa e companianan cu ta situa den vecindario. Gobierno di Aruba a cera e contract cu Mota-Engil pa 22.5 aña di cual 20 aña ta pa mantencion di ful e proyecto y e otro 2.5 aña ta pa e construccion di ful e proyecto.
Lo mas importante pa D.O.W. y Mota–Engil ta e siguridad pa turistanan, kendenan semper ta crusa e caminda di Tropicana Hotel pa bay haci compras na Super food. Pa nan siguridad Mota-Engil lo pone un zebrapad y un luga special p’e turistanan por pasa teniendo na cuenta cu e autonan ta core duro ariba L.G. Smith Blvd.
Marlon Croes, Director di D.O.W., a expresa cu e presentacion duna na e miembronan di AHATA ta algo cu mester a sosode hopi trempan. D.O.W. hunto cu e contratista Mota-Engil a tene e sesion aki pasobra nan lo ta drentando e area cu lo afecta hopi hotelnan den nan operacion y nan mester haya e sosten, unda cu conhuntamente nan lo realisa e cambionan aki.
E cambionan aki no lo bay sin molester, sin problema, pero e contratista conhunto cu D.O.W., Cuerpo Policial, hotelnan y AHATA lo yega na un manera di traha. Asina aki e operacion di hotelnan lo keda viabel, keda profesional sin cu ta stroba nan. “Mester tene cuenta cu tur stakeholder, manera AHATA, hotel, polis, ambulance y brandweer pa por yega na e sitio. Tambe tur esunnan cu ta transporta turista pa y for di e hotelnan ”, asina Marlon Croes a expresa.
E feedback cu D.O.W. a ricibi tabata uno hopi productivo. A keda palabra cu prome cu e construccion di cada segmento, lo reuni cu esunnan di e hotel cu lo wordo afecta na e momento ey, y conhuntamente yega na un miho plan pa haci e molester pa e hotel y specialmente e turista lo menos posibel y unda ta e miho luga pa turistanan por crusa di un banda pa otro banda di caminda. Specialmente den e area di Eagle Beach.
Marin Bijl, General Manager di Divi & Tamarijn All Inclusive, a haya cu e presentacion a clarifica e preguntanan cu nan tabatin. E parti bon di esaki ta cu e hotelnan lo ta parti di e progreso completo, unda cu lo invitanan pa ta presente na diferente reunion. Marin Bijl a expresa cu durante e reunionnan aki nan tambe lo por yuda tuma decision door di duna nan opinion. El a sigui elabora cu nan lo ta papiando cu e turistanan riba e trabounan cu lo ta tumando luga, pa asina e turistanan lo ta na altura.
