ORANJESTAD, Aruba – A parti e orario di lunch den tres sesion, cuminsando for di 11or di mainta te cu 2or di merdia pa asina acomoda tur e empleadonan trahando diasabra, pa celebra nos dia nacional, Dia di Himno y Bandera. Cu musica di Caha di Orgel, cu un menu crioyo, decoracion nacional y varios premio pa rifa entre e empleadonan, Barceló Aruba a celebra e dia special aki. Gerente General di e hotel, Samuel Johnson a felicita tur empleado na e ocasion special aki.
El a splica cu esaki no ta prome biaha cu Barceló Aruba ta organisa eventonan asina, pasobra henter aña ta celebra e dianan importante pa empleadonan, manera ta Dia di San Balentin, Dia di Himno y Bandera, Dia di Obrero, Dia di Mama, Dia di Tata, Pasco, Aña Nobo y asina lo por sigui menciona. Tur celebracion ta bay cu evento y hopi biaha combina cu premionan.
E edificio unda Barceló Aruba ta situa den pasado tabata Americana Hotel, despues a cambia pa Allegro Resort, despues a bira Occidental y na November 2016 a cambia oficialmente pa Barceló.
E hotel, operando segun e plataforma “All Inclusive” ta di 5 strea, cu un total di 373 camber, tu r cu balcon cu un bista espectacular di e lama di Palm Beach. E hotel ta conta cu no menos di 5 restaurant, diferente bar, centro di entretenimento nocturno y hasta un casino. Na Aruba nan ta emplea mas o menos 400 empleado, den forma directo y indirecto. Barceló Aruba ta un di e hotelnan cu e grado di ocupacion di mas halto riba nos isla, henter aña.
Simon Barceló a funda e grupo Barceló na aña 1931 na e isla di Mallorca, na Spaña. Awendia e compania ta opera mas di 230 hotel cu mas di 50 mil camber den 21 pais. E grupo tin tambe un division di biahenan, esta e compania Avoris, cu ta dispone di mas di 700 agencia di biahe den 4 continente, varios operador di tours. Tambe nan tin nan mesun compania aereo. Na tur nan ta conta cu 24 mil empleado.