En conexion cu e celebracion di Dia di Himno y Bandera 2025, Minister Maduro di Cultura ta informa, cu dilanti di Bestuurskantoor tin un bunita decoracion pa por saca potret y keda cu un recuerdo unico di e celebracion di nos dia nacional.
E decoracion ta ilustra e tema di e celebracion di e aña aki, cual ta “Ban demostra ken nos ta, ban celebra nos identitad.” Un bunita tema pa recorda nos riba e importancia di sa ken nos ta, di sinti nos mes orguyoso di nos mes y di nos herencia cultural, y di tuma un tempo semper pa gradici Aruba pa ta un Pais unda nos por tin e libertad pa ta nos mes.
Minister Maduro ta extende un invitacion pa pasa saca un potret y publica esaki riba medianan social pa asina demostra cu nos ta un Pueblo orguyoso di por ta biba na Aruba. E decoracion ta ilumina parti anochi pa asina mas hende por haya un oportunidad pa traha un bunita recuerdo di e celebracion di Aruba su Dia di Himno y Bandera 2025.
