Siguiendo cu e tradicion relaciona cu dia di Himno y Bandera,
ORANJESTAD – Durante e dianan aki, prome cu e fecha di celebracion di Dia di Himno y Bandera, Prome Minister Evelyn Wever-Croes ta bishitando varios scol rond Aruba pa mira con cada un ta preparando pa e dia grandi aki. Diahuebs 13 di maart, riba e prome dia, Prome Minister acompaña pa Minister di Cultura, Xiomara Maduro a bishita St. Fransiscus College na Playa, klas 4 y 5.
Na su yegada, e mandatarionan a wordo ricibi pa Cabesante Nadine Kiringdongo hunto cu alumnonan feliz cu a haci entrega di un bouquet di flor na e dos ministernan.
Prome Minister por a presencia obranan den miniatura di monumentonan di Aruba, cu ta un di e temanan di e scol su proximo exposicion. Ta trata di obranan masha bunita crea pa alumnonan hunto cu nan famia. E mandatario a keda impresiona cu un di e monumentonan cu ta trata un replica den miniatura di Kapel di Alto Vista. E obra aki ta asina detaya cu por wak e parti di paden di e Kapel unda por wak e bankinan y hasta un imagen di Mama Maria.
Echonan asina ta refleha con e scol ta pone enfasis riba e importancia di cultura y historia di Aruba y desde un edad jong, ta inculca e amor pa Aruba den nos muchanan. Prome Minister a termina gradiciendo cabesante Nadine Kiringdongo y henter su ekipo di maestro pa nan enseñansanan na e muchanan y pa e oportunidad di por a combersa un rato cu e muchanan.
“Akinan e muchanan ta bon prepara pa e celebracion y mayan nan ta bay tin un exposicion masha bunita y desde awe mi ta desea nan un feliz Dia di Himno y Bandera”, Prome Minister a expresa.
