Den partido POR su plan di gobernacion ‘Vision 17-21 Hunto Nos POR’ tin informacion detaya di con POR lo atende pa mehora diferente aspecto di importancia den nos comunidad. Pa loke ta e seccion di transporte, tin diferente desaroyo cu lo bay wordo crea pa mehora nos sistema di transporte den tur aspecto.
POR den e proximo gobernacion lo bay modernisa nos leynan di aviacion conforme reglanan y rekisitonan di ICOA. Percura pa nos sistema di registracion di avion bira mas competitivo. Profesionalisa nos Departamento di Aviacion Civil pa esaki por cumpli cabalmente cu su tarea di supervisa nos sector di aviacion. Tambe hopi importante ta pa sostene plannan di inversion den mehoracion continuo di facilidadnan, operacion y servicio di nos aeropuerto. Sostene plannan di inversion den ekipo y tecnologia moderno pa loke ta servicio di trafico aereo. Unabes cu e proyecto di “surveillance” (radar) keda finalisa, lo inicia negociacionnan cu gobierno di Hulanda y Corsou pa expande espacio aereo di Aruba.
Lo stimula y incentiva iniciativa priva pa sigura conexionnan aereo rendabel y competitivo entre islanan ABC. Implementa e rapport “Maritieme Toekomst van Aruba” (MTA) cu e meta pa engrandece importancia di sector maritimo pa nos economia y sigura uzo safe di nos awanan y sin afecta nos medio ambiente marino. Sostene proyecto di fast ferry entre islanan ABC cu e port of call di Aruba situa na San Nicolas. Promove registracion di barconan di cual e doñonan ta di exterior. Continua y finalisa e proceso di independisacion di Departamento di Nabegacion.
Den consulta cu stakeholders lo formula y implementa un plan strategico di mobilidad. Punto di salida principal ta cu tur districto y bario mester conta cu servicio di transporte publico confiabel y puntual cu ta cumpli cu necesidad di nos comunidad. Modernisa nos leynan di transporte publico y profesionalisa Departamento di Transporte Publico pa asina por combati e fenomeno di taxista pirata y tur otro incumplimento cu regla na un forma efectivo.
E meta di e articulo aki ta pa trece informacion di e plan cu POR tin pa e proximo gobernacion mas cerca di bo. Un plan cu ta consisti di hopi lunanan di dedicacion y consulta cu diferente gruponan den comunidad. Pues e ta un plan hinca den otro cu prioridadnan cu comunidad a indica y un plan cu tin e adelanto di e individuo na prome luga. E plan completo ta obtenibel riba pagina di Facebook di POR.