Home Uncategorized Candidato di AVP: Carlos Bermudez: “Automatisacion ta haci servicionan miho, mas accesibel...

Candidato di AVP: Carlos Bermudez: “Automatisacion ta haci servicionan miho, mas accesibel y agradabel pa e ciudadano y funcionario publico”

SHARE

ORANJESTAD – E rol di gobierno pa stimula nos economia lo ta ainda mas efectivo ora nos usa tecnologia digital y automatisa tur nos actividadnan, sistemanan y servicionan di gobierno y esey ta meta di AVP. Asina candidato #14 riba e lista di Partido di Pueblo Arubano AVP a trece dilanti durante e presentacion di programa di partido. Bermudez ta un experto den informatica cu ta pusha iniciativa pa modernisa nos pais den e sector aki.

 

“Nos kier pa tur nos asuntonan, tur nos servicionan yega na tur hende y wordo bon maneha,” el a bisa. Una bes cu tin e aspecto aki avansa, lo por ripara cu e tin un efecto positivo riba otro areanan di nos bida. “Nos kier pa nos bida ta mas cu djis traha; pa bida ta yen di experiencianan bunita cu momentonan di alegria cu famia y amigonan. Tambe nos kier siguridad y prosperidad pa tur; ta pesey nos mester organisa tur nos asuntonan di un forma cu nos por biba e bida cu nos ta desea,” Bermudez a splica.

 

Door di automatisa procesonan compleho nos por simplifica proceduranan, haci nan mas accesibel pa tur hende, unda cu nan por ta, duna servicionan mas lihe y aumenta e grado di satisfaccion di tanto e ciudadano como e trahado di gobierno.

Bermudez ta splica cu segun e Programa di Partido di AVP cu yama ‘Padilanti: 2017 – 2021’, kier crea ta un red di servicionan digital di gobierno o sea “E-government”. Esaki lo haci Gobierno como organisacion accesibel, eficiente y transparente y asina e integridad di e organisacion gubernamental y calidad di e servicionan lo mehora grandemente.

Automatisa procesonan clave manera servicio di otorgamento di permiso, licencia, informacion, y hopi mas den Gobierno y haci nan mas accesibel riba Internet ta un punto importante pa mehora e rol di gobierno den comunidad.

“Ban scoge pa futuro di Aruba y no laga ningun hende spantabo cu pensamentonan cu ta sali di e scuridad di un pasado cu hamas nos kier bolbe bek na dje. Ban scoge pa bay padilanti y no patras!” e candidato a finalisa bisando na e publico anima cu a bin pa scucha e plan cu partido AVP tin pa futuro di Aruba.