“Scol ta mas cu infrastructura. E ta un centro unda muchanan ta forma nan mes tanto educacional como civico”
ORANJESTAD- Diahuebs scolnan a habri bek. Muchanan chikito, muchanan mas grandi y teenagers a cuminsa cu nan aña escolar nobo. Algun pa prome bes na scol basico, otronan a cuminsa nan enseñansa secundario y tambe tin un grupo cu ta cuminsa den un lokaal nobo den un scol sea renoba of nobo traha. E ultimo aki ta e caso cu alumnonan di scol basico Prinses Amalia na Seroe Blanco. Cu masha ceremonia y tambe baile, canto y discursonan e scol a habri su portanan. Esaki a sosode den presencia di Ministernan Hooyboer-Winklaar y Arends, mayornan y demas invitadonan. Yiunan di Minister Arends tambe ta atendiendo e bunita scol aki.
Minister Arends: “Mi no ta aki solamente como Minister di Asuntonan Economico, pero tambe como mayor. Nos yiunan ta cuminsa den eerste klas awe. Seis aña pasa nos yiu mayor a cuminsa na e mesun scol y ainda nos ta mayornan di scol Prinses Amalia, awe den un edificio nobo. Ta yena mi cu hopi satisfaccion, pero tambe ta duna mi un sentido di trankilidad di mira e ekipo di docente y un cabesante cu hopi energia pa dirigi e scol. Kico mas bo kier como mayor pa bo yiu ora e ta atende scol.”
Minister Arends tabatin palabranan di elogio pa su colega Minister Hooyboer-Winklaar kende a traha duro pa mehora e scol y awe ta wak e frutonan di e trabou duro aki. “Tur esaki ta tambe trabounan cu Gabinete Mike I y II a eherce drechando un gran cantidad di scol y construyendo nobo.Minister Arends a enfatisa cu esaki ta mas cu infrastructura, bloki y klinker. “E ta un centro unda muchanan no solamente ta forma nan mes den e parti educacional, pero tambe ta haya nan formacion civico cu tur mucha mester haya pa mayan ta ciudadanonan ehemplar di nos comunidad.”
“Awe ta un bunita dia pa mi como mayor, pero tambe como parti di gobierno por trece mi yiunan na un scol nobo, unda un ekipo di maestro dedica ta traha. Hasta durante e periodo cu nan tabata traha den un scol di shen aña bieu, nan dedicacion y amor semper tabatey. Esey ta algo caracteristico di maestronan na Aruba cu semper ta dedica nan mes na nan alumno y studiantenan.”
Scol basico Prinses Amalia ta un scol di gobierno ( Dienst Publieke Scholen). “Gobierno ta aloca su fondonan di manera corecto pa loke ta trata enseñansa. Tabatin un achterstand hopi grandi den infrastructura di scolnan. Gobierno tin 8 aña trahando riba esaki. Obviamente tin algun scol cu mester wordo finalisa, pero ya stapnan hopi grandi a wordo tuma pa loke ta trata enseñansa basico cu ta forma e studiantenan pa nan por bay sea un scol secundario of vocacional. Pa loke ta estudionan mas avansa gobierno ta presentando oportunidadnan laboral den e 4 topsectornan cu ta tecnologia limpi, logistica, industrianan creativo y exportacion di conocimento.”