Aruba tin un lista toch largo di casonan di asesinato, den pasado tabata tin tur sorto di asesinato, entre e asesinatonan tabata tin crimennan passional, pero tambe asesinatonan den famia, y te hasta hopi cruel. E biaha aki nos lo dedica Historia di Aruba na un asesinato den cual un homber hoben mes a yuda asesina su primo, mescos cu animal salvahe e asesinonan a maltrata curpa di e victima.
E asesinato hopi cruel aki a sosode na Maart 1979, esaki tabata e di dos den un siman di tempo ey. E prome (ta e historia anterior cu nos a publica) a sosode riba 10 di Maart na Ponton despues cu un homber casa a secuestra su amante, e la hink’e den su auto, bay cu ne na Ponton, den un mondi banda di e antena di Voz di Aruba, unda e la hinca su amante como 8 pa 9 biaha y e amante a fayece.
E di dos asesinato a sosode casi 6 dia despues, riba 16 di maart 1979, un di e asesinatonan di cruel den historia di Aruba, e asesinonan manera salvahe a maltrata nan victima, te ora cu e no tabata duna señal di bida mas.
Bubali:
Diabierna 16 di maart 1979 den oranan di merdia, den cura di un cas na Bubali, dos mucha a bin topa cu un curpa sin bida riba vloer. E victima tabata tin solamente su jockey bisti. E dos muchanan a spanta y a core bay bisa nan mama. E mama mesora a bati alarma.
E.M. (28) asesina cruelmente
E victima tabata un homber hoben di Bubali, e tabata tin 28 aña di edad.
Na momento cu e asesinonan a bay busk’e, e tabata drumi den un cuarto den cura di e cas di su defunto welo na Bubali. Nos lo usa solamente nan inicialnan, e victima ta E.M.
Segun e investigacionnan haci na e sitio, na momento cu e curpa a wordo descubri den cura di e cas, e victima E.M. ya lo tabata tin como 10 pa 12 ora morto caba. E ultimo biaha cu bisiñanan a mir’e, tabata dia 15 di maart despues di 10’or di anochi.
E marduga di 16 di maart, e bisiñanan tabata scucha e cachonan ta blaf masha hopi mes, pero nunca por a biba pensa cu tres persona den nan bario lo por tabata asina capas di comete un asesinato asina cruel, un di nan ta primo di e victima.
E personanan cu a yega prome na e sitio a conta cu e defunto su curpa no tabata tin mas caminda pa a pone golpi y kapnan.
Segun e prome investigacionnan haci, ta mustra cu E.M a wordo bati te ora cu su asesinonan tabata sigur cu e la fayece. E la haya hopi kapnan grandi, na su frenta y riba su wowo.
Persona na e sitio a conta, e victima a yega di expresa cu tin hende ta busk’e pa mata, pero nunca e la bisa ken nan ta y pa e motibo aki e victima tabata cana cu un cuchiu semper den su saco di carson pa defende su curpa.
E prome informenan tabata bisa cu e asesinonan a sorprende E.M. den su soño. E la logra sali for di e cuarto, pa bay busca ayudo pero no a logra yega leu, e lo a cay na caminda y aki e la wordo bati formalmente cu biga, piedra y bloki lagando e curpa sin bida benta den un plas di sanger atras.
Autoridadnan competente a keda oranan largo na e sitio haciendo investigacion. Inspectornan di e tempo ey, Willems y Martina, tambe fiscal mr. Hoogland y Hues mr. Robbers tabata na e sitio. Dr. Lin dfm. a presenta na e cas na Bubali y a constata morto di E. M. (28) kende tabata tin casi 12 ora morto, te cu e curpa a bira stijf caba.
E curpa a wordo tuma den beslag pa autopsia. Mortuario di e tempo ey, Zepp Wever a transporta e curpa.
Polis riba bon pista
Despues di e investigacionnan haci na e sitio, hopi lihe autoridad policial tabata riba e bon pista pa soluciona e caso di asesinato aki, autoridad a haya cooperacion di habitantenan y asina por a soluciona e caso tristo y cruel aki. Aruba e siman ey a conoce dos asesinato den menos cu un siman.
Mientras cu autoridad tabata haciendo investigacion nan a wordo informa cu E. M. ultimamente a haye na varios ocasion den pleito y problema cu varios persona. Autoridad no por a exclui cu por tabata trata di un acto di venganza. Tambe tabata wordo sospecha cu e caso por tin di haber cu buscamento di droga, pero esaki no por a wordo confirma. E investigacion tabata den full swing y e polisnan tabata hopi optimista y hayando cooperacion di e habitantenan di e bario, nan lo por logra soluciona e caso aki hopi lihe, cual a sosode tambe.
Detencion di e tres sospechosonan
Dia 17 di maart 1979, polis a detene e prome sospechoso R.R.(33). Mientras R.R. tabata deteni y tabata bou interogacion, na prome instante e la keda nenga su envolvimento den e asesinato aki. Esaki no a dura largo cu R.R. a cuminsa papia, mesora polis a bay detene dos persona mas, cu ta un hoben di 20 aña A.G. y un otro hoben di 22 aña di inicial E.H. cu detencion di e dos sospechosonan aki e caso a wordo soluciona. Diahuebs 22 di maart 1979 den oranan di anochi a detene A.G. y den oranan di merdia a detene E.H. tur tres sospechoso a admiti di a asesina E.M.
Autopsia
Dialuna 19 di maart 1979, den oranan di mainta patholoog a haci autopsia pa asina determina e causa di su morto. E resultado di e autopsia a bisa cu e E.M. (28) a fayece na e maltrato serio cu e la ricibi di su asesinonan. E asesinonan a maltrate E.M. manera un animal, e la ricibi hopi golpinan serio paden. Tambe e autopsia a confirma cu e asesinato a tuma lugar un 12 ora prome cu e curpa a wordo haya.
E sospechosonan confronta cu e cadaver
Diabierna 23 di Maart 1979, e tres sospechosonan a wordo confronta cu e curpa sin bida di E.M. Den oranan di mainta nan a wordo hiba na Mortuario Zepp Wever y confronta cu e curpa di E.M.
Na momento cu e sospechosonan a wordo hiba na Zepp Wever, un grupo grandi di persona, entre nan varios miembro di famia tabata para dilanti di e mortuario wardando yegada di e tres sospechosonan. E tres sospechosonan a wordo confronta cu e cadaver y den oranan di merdia a tuma lugar e reconstruccion di e caso. R.R., E.H y A.G. kende ta primo di e defunto a wordo hiba na e cas caminda nan a mata E.M. Fiscal tambe tabata presente.
Reconstruccion di e caso na Bubali
E reconstruccion a cuminsa cu e anochi ora cu e tres sospechoso nan a bay na e cas pa asesina E.M. tur cos tabata mustra bon planea. Manera nan a yega na e cas E. H. mester a saca e E.M. for di e cuarto, unda e tabata drumi.
Mesora R.R. a tene di patras pa asina E. H. dal e algun mokete den su cara. E victima a cay y R.R. a bay sinta riba E.M. y a sigui golpi’e. Durante reconstrucion nan a mustra con nan a sigui bati’e cu un bat di baseball den su cara, esaki lo a wordo haci pa A.G. kende ta su propio primo.
Maske E.M. a trata na core, e no por a yega mucho leu, e la bolbe cay. Pa tabata sigur cu e victima ta morto, nan a dicidi di baha varios biaha un bloki di cement riba e victima su cabes y riba su pecho y asina e la keda benta abou te ora e dos muchanan a bin topa cu e curpa sin bida, den oranan di atardi.
Tur tres a admiti cu nan a maltrata E. M. despues di e reconstrucion nan a wordo hiba bek nan cel y asina nan mester a keda warda te dia nan caso a bay corte y hues a dicta sentencia.
Den Corte, Fiscal a exigi 20 y 10 aña pa nan
Diabierna 1 di december 1979, despues di casi 9 luna e caso a yega corte. Den oranan di mainta, e tres acusadonan di e caso di asesinato cruel na Bubali mester a presenta dilanti mesa berde.
Durante tratamento di e caso den corte, a cuminsa cu tur loke a sosode riba e anochi di 15 di maart pa 16 maart for di momento cu nan a drenta den e cuarto unda e victima ta drumi y te na momento cu nan victima no tabata duna señal di bida mas. Despues cu Hues a scucha e officier y acusadonan e tuma desicion cu e lo dicta sentencia dia 14 di decemberr 1979.
E diabierna mainta aki e habitantenanan di Bubali tambe tabata mustra di tabata hopi interesa con e caso lo bay tuma su rumbo den corte. E Officier a exigi contra e acusado principal R.R (33) 20 aña di castigo di prison, pa motibo cu a keda prueba cu e la asesina E.M. Mientras e otro dosnan a participa na e asesinato aki, pa e dosnan aki e Officier a exigi 10 aña pa cada un.
Tur arma cu a wordo usa poni riba mesa
Diabierna mainta un biaha mas a rebiba e caso tristo aki. Tambe tur locual a wordo usa pa mata E.M. a wordo presenta dilanti mesa berde, un pida palo, un pida biga, bloki cement, un baranca grandi, un bate di basebal etc. tur a wordo poni riba mesa pa Hues mes saca su conclusion.
Acusadonan den Corte
Segun e acusado principal R.R. den corte a declara cu e la scucha riba 15 di maart den oranan di mainta cu E.M. lo ta canando cu un cuchiu pa mata su persona. Esaki a pone cu e mester a arma su mes cu un machete. E la bay na e veld bieu di Bubali pa busca e victima pero no a hay’e eynan.
Riba e dia di e sucedido fatal, e tres acusadonan tabata dal betro den cura di cas di B.T. te den careda di mey anochi cu B.T. a dicidi cu e ta bay drumi. Na e momento aki, R.R. a propone pa nan bay loer E.M. y dun’e un sota, pues maltrat’e. E dos acusadonan E.H. Y A.G. no por a corda si R.R. a bisanan “ban mat’e, paso toch nos no lo haya castigo e ta un persona vogelvrij”.
E acusado E.H. a conta cu hunto cu R.R. nan a bay den e cuarto di E.M. y a top’e drumi. E la dal’e den su soño cu un pida palo E.M. full suf a lanta bula pa core bay, pero aki ta caminda cu R.R. a dal e cu un baranca den su cara.
R. R. y E.H. a saca e victima pafo mientrastanto cu R.R. tabata tene E.M. di patras, e tabata instiga E.H. y A.G pa dal E.M.
E.H. a cuminsa bewerk e victma cu un pida palo y A.G. a usa un baranca. Na dado momento e victima no tabata por mas y a cay riba vloer. E.H. y tambe R.R. a pasa man pa un bloki cement y a lage cay varios biaha riba e victima, riba su cabes y riba su pecho. R.R. a keda haci esaki te ora cu e la constata cu E.M. no tabata move mes mas y cu e lo a fayece. Asina E.H. y A.G. a declara.
Autopsia den corte
E autopsia haci riba e victima tambe a wordo trata den corte y esaki tabata mustra cu e curason y e higra di e victima a scheur y tambe tur su ribchinan tabata kibra, di tanto golpi cu e la ricibi.
E acusado principal a nenga di a planea pa mata E.M. segun su persona e la bewerk e victima djis cu un pida palo y no a mishi cu e bloki cement pa motibo cu recientemente e lo a haya un accidente di auto y su lomba a keda sentido. Segun su persona e no tabata capas di hisa un blokie cement, pero e la admiti si di a instiga e otro dos acusadonan pa nan bati e victima.
E declaracion di R.R. a wordo contradici pa E.H. y A.G. ambos acusado a wordo yama como testigo tambe. Durante tratamento di e caso a wordo mustra cu E.H. Y A.G. no tin un strafkaart y tabata mustra dos hoben trankilo y amabel. Mientras cu R.R. si tabata tin un strafkaart caba pa maltrato y tabata conoci pa ta un persona agresivo. Despues di a scucha e acusadonan, e abogadonan y Oficier, Hues a tuma e desicion di dicta sentencia dia 14 di december 1979. mr Sjiem Fat tabata abogado defensor di E.H.y A.G. mientras R.R. tabata tin abogado Ben Nagtegaal.
Sentencia a cay
Diabierna 14 di December 1979, Hues a dicta sentencia den e caso di asesinato cruel na Bubali, di 15 pa 16 di maart den cual e homber di 28 aña di fam M. a wordo asesina. Officier a exigi 20 aña di castigo di prison pa E sospechoso principal pa motibo cu a keda prueba cu e la asesina E.M. Hues a dun’e 18 aña di castigo di prison, kitando e tempo di voorarest. E dos otro sospechosonan cu a participa na e asesinato, Officier a exigi 10 aña, hues a duna cada un 9 aña di castigo di prison, kitando e lunanan cu nan tabata den voorarest.
A.G. a fayece na april 2010 y E.H. na 2012
Despues di e asesinato, cuanto tempo tur a keda cera no ta conoci, pero nos tin entendi cu dos di e acusadonan a fayece, A.G. a muri hoga na 2010 y e otro E.H. lo a muri di un of otro enfermedad na 2012. Unda R.R. ta, of ken e ta no ta conoci pa nos. E cas caminda e asesinato a tuma lugar na 1979 a keda bandona y basta aña pasa entre 2007 cu 2010, un persona lo a comete suicidio den e cas aki. Awendia e cas ta cubri pa mata y sushedad, den mondi.
Fuentenan: Anonimo / Nobo