Dos homber Frances a keda deteni despues di a subi riba e icono Cristo Redentor na Rio de Janeiro.
Rio de Janeiro, Brazil: Dialuna mainta, dos homber di nacionalidad Frances a keda deteni, despues cu den oranan trempan di mainta , a wordo descubri para riba un di a brasanan di e estatua Cristo Redentor, pa asina mira e salida di solo for di un angulo completamente diferente.
Despues cu nan a caba di disfruta di e bunita bista di e cuidad Rio de Janeiro y e salida di solo, nan a keda deteni pa autoridad.
Clement Dumais, di 28 aña y Paul Roux-dit-Buisson, di 27 aña a dicidi di drenta diadomingo anochi den e monumento di 38 meter. nan a keda scondi eynan, despues cu e sitio turistico aki a wordo cera pa publico. Prome cu solo a sali, nan a dicidi di subi un trapi largo y sali via un bentana chikito na un di e brazanan pa asina disfruta di un bista unico di e cuidad y e bahia de Guanabara, e brasa nan di e estatua ta 28 meter largo.
E dos hombernan procedente di Paris, a wordo descubri pa autoridad dialuna mainta trempan, na momento cu autoridad a nota cu tin dos homber para riba e brasanan di Cristo Redentor. E hombernan a keda deteni, pero despues di a paga un fianza di mas o menos 10 mil real cual ta equivalente na 1877 dollar cada un. Nan a wordo laga den libertad, pero mester presenta ainda dilanti hues.
E duo aki tin custumber caba pa haci hazañanan similar, na Dubai, New York y Paris. For di riba e edificionan aki nan ta saca potret y graba video pa pone riba social media.
Na Brazil, autoridad a confisca nan camaranan y a delete tur e potretnan.
E estatua di Cristo Redentor ta riba e cero yama Corcovado, e ta e sitio turistico mas bishita di Rio de Janeiro, e ta ricibi anualmente un dos miyon bishitante. October venidero e estatua ta celebra 90 aña di su existencia.
