Laga mi comparti con un gobierno di un partido y un di coalicion ta funciona cu e cooperacion cu mester tin entre e ministronan. E ta a base di un programa y cooperacion entre e ministronan pa pone cos sosode. Tin ora mester cooperacion pa pone cos bon sosode! Cada ministro tin su mes cartera cu parlamento ta aproba su presupuesto cu su maneho pa e por traha y funciona segun reglanan di gobernacion y e ley di comptabilidad. Den cuadro cu cada ministro y partido tin su hendenan hopi vez e ministronan ta ser acerca pa tur clase di cooperacion di ciudadanonan den pueblo y ora e no ta bo cartera, automaticamente a base di confiansa y solidarismo bo ta pidi un colega cooperacion. Al final ta e ministro cu tin e cartera ta keda responsabel y tanten cu e no coopera y firma su apoyo no tin nada legalmente regla pa ningun hende. Tin cos cu por, pero tin tambe cu no por! Ta keda na bo huicio politico como ministro kico bo por coopera cu ne y kico ley no ta permiti.
Muestra di un desconfiansa total
Dia un nota di bo pa cooperacion di un colega ser poni “ter inzage“ na parlamento cu esaki lo ta corupcion, esaki ta muestra di un desconfiansa total cu no por ser ni tolera corda pa acepta. E anotacion di un colega cu ta algo interno hamas por ta fuente di discusion, pasobra abo como ministro ta keda responsabel toch y tanten cu abo no tuma un decision no tin absolutamente nada legalmente regla pa ningun hende! Ningun hende a haya algo y bo no por tilda ningun hende di nada! E cos aki ta un desconfiansa den otro y ta crea un individualismo cu mi ta cera porta pa tur cooperacion entre coleganan. Ken ainda lo kier traha cu bo? Un desconfiansa total pa traha hunto. Ta cual ministro den e gobierno aki lo durf pidi Marisol cualkier cooperacion cu ta normal, anto mayan e ta ser poni “ter inzage” na parlamento como fuente di corupcion? Esun cu traha cu un persona inconfiabel asina ta cuestion di tempo, dia abo tambe lo ta na turno pa trata na hak pia politico di otro cu acusacionnan baho y vil. Tur otro ministro lo no pidi otro ningun cooperacion mas pa mayan e no hay’e di ser tilda tambe di corupcion. E cos aki ta comienso di un fin cu ta haci e coalicion y nos pais ingobernabel, unda sano huicio a bira cashi di pica pa spiona otro, saca documento pa prensa y oposicion y pone cos interno priva di un colega pa otro ariba caya.
Redashi y calumnia
Ami semper a bisa cu esun cu traha blaar mester sinta ariba su blaarnan. No por haci tur hende sospechoso sin ningun evidencia of prueba di cosnan cu nunca a tuma lugar. Ora bo haci e weganan politico aki Ministerio Publico no ta haci ni trabao di e redashinan aki y no kier ser usa tampoco pa bo cabay politico. Nan lo no participa na e weganan aki di bringa otro cu acusacionnan hibando bo mesun colega ariba altar di sacrificio cu redashi y calumnia. Si bo kier keha, bin cu evidencia y prueba of baha na awa na tempo pa locual bo mes a pidi pe!
Mi tabata 3 periodo diputado y a guia e pais aki 4 vez como Ministro Presidente y tabata basta aña den oposicion, pero nunca a experiencia incolegialidad, calumnia y redashi entre un ministro y su coleganan y e comportacion inaceptabel, intolerabel aki ta e fundeshi di termina eternamente cooperacion entre coleganan. E cos aki ta sigui crea e impresion, pensamento cu tur politico ta corupto sin tin ningun evidencia y prueba. By the way, e ministro aki a crea e impresion cu ta e empleadonan publico mes por “regla cos” y no e director y e ministro cu ta firma, locual categoricamente no ta berdad. Un ambtenaar no por duna ningun hende nada sin cu e director of e ministro firma! No bin gaña ni trata na laba celebro di esnan cu no sa con cos ta bay den gobernacion. Lo mi start un “fishing expedition“ di awe te dia e weganan di manipulacion aki caba. Mi opinion personal tur dia.