Home » Hoben di 17 aña ta hinca otro di 15 aña cu sker

Hoben di 17 aña ta hinca otro di 15 aña cu sker

by Admin
0 comment 79 views

ORANJESTAD – Awe e homber J.M. a presenta den Corte pa e caso penal cu Ministerio Publico a cuminsa contra dje. Aruba Native por a compronde cu J.M., 3 aña y 6 luna pasa, a hinca un hoben di 15 aña cu sker.

E acusacion di Fiscal contra J.M. ta cu dia 29 Februari 2017, el a hinca un hoben di 15 aña di un pida hero. Esaki ta wordo considera intento di maltrato severo. Hues a mustra cu e caso ta 3 aña y mey pasa y e tempo ey J.M. tabatin 17 aña. El a hinca e hoben W. (15). J.M. a admiti den Corte di a hinca W. cu un sker.

Hues a mustra cu for di investigacion di Polis ta sali na cla cu tabatin un problema entre J.M. y e hoben W. y ta relaciona cu gang. Dia 29 Februari 2017 e ruman homber di J.M. tabata cana cu J.M. y W. tabata tira palabra pa nan. Na dado momento, e ruman homber a sinti dolor na lomba y a resulta cu W. a tir’e cu piedra. J.M. a core tras di W. y na dado momento a hink’e cu sker na custia banda robez.

Fiscal a puntra pakico J.M. tabata cana cu sker. El a splica cu e ta usa sker pa corta marihuana. Fiscal a remarca cu e tempo ey Reclasering a señala cu J.M. ta usa marihuana. Segun J.M. e ta usa marihuana pasobra e ta lag’e sinti trankil. El a bisa cu ainda e ta usando.

Hues a mustra cu segun e raport di Reclasering, a papia cu J.M. y e mama. J.M. a bisa cu e tin amigo cu ta den gang. E mama a bisa cu J.M. ta trankil y no ta papia di su problemanan. E ta sera su mes pa esaki. Tin un bon relacion di famia. Te ainda J.M. ta usando marihuana. Reclasering a recomenda pa guia J.M. pa e stop e uso di marihuana. Segun J.M. e kier stop di usa. El a bisa Hues e ta sperando un yiu na November 2020 y promer cu esey e lo stop di huma marihuana. E ta dispuesto di haya ayudo di Reclasering.

Fiscal a bisa cu e ta haya legalmente proba. Fiscal a remarca cu J.M. tin suerte cu no tabata fatal. Esaki ta un intento di asesinato y si e tabata mas bieu, e lo a keda sera. Fiscal a hala su atencion pa hinca esaki bon den cabez. Fiscal a tene cuenta cu e tempo cu a pasa y e edad hoben. Fiscal a exigi 161 dia di prison, di cual 150 dia (5 luna) ta condicional cu un tempo di prueba di 2 aña y bou guia Reclasering. Tambe Fiscal a exigi 40 ora di trabou pa comunidad of 20 dia sera.

Mr. Edwards a bisa Hues cu e ta haya cu mester mira e presion cu gang ta pone riba J.M. y su ruman. J.M. y ruman a bisa cu nan a wordo molestia door di gang. E mama a bisa cu diferente biaha a haci denuncia na Polis y mas denuncia haci, mas su yiunan ta wordo molestia pa gang. Den periodo di carnaval ta e temporada cu gang ta busca pa regla cuenta. Ta den e temporada di carnaval tambe e incidente aki a sosode. Na opinion di abogado, ta e miembro di gang, W., a ataca e ruman di J.M. promer y J.M. a bay defende su ruman. Ora e incidente a sosode, J.M. a mira tur e biahanan cu nan a wordo molestia door di gang. E abogado a pidi Hues pa tene cuenta cu e circumstancia. E abogado ta haya exigencia di Fiscal hopi pisa y no ta haya cu mester pone trabou pa comunidad mirando cu J.M. ta bay bou guia di Reclasering.

Hues a sera tratamento di e caso y a dicta sentencia di biaha. Hues ta haya legalmente proba cu J.M. a hinca W. cu sker na custia robez. Pa cu e castigo, Hues a tene cuenta cu e circumstancia bou cual e incidente a sosode. Tambe a tene cuenta cu ta 3 aña y 6 luna pasa esaki a sosode. Hues a bisa J.M. cu e tin suerte cu e hincamento no tabata fatal. Hues a condena J.M. igual na exigencia di Fiscal, 161 dia di prison di cual 150 dia (5 luna) ta condicional cu un tempo di prueba di 2 aña y bou guia Reclasering. Tambe 40 ora di trabou pa comunidad of 20 dia sera.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio