Durante e decada di 1970 pa 1980, Aruba su historia a conoce hopi suseso, algun hopi tristo, otro alegre, otro interesante, den pasado tin cosnan cu nos como ser humano lo kier sa mas y con nan tabata bay of funciona.
E biaha aki nos lo dedica un espacio den nos Historia di Aruba na un sucedido na aña 1978, cu a paralisa trafico di merdia den Oranjestad, a crea un situacion caotico y a trece hopi panico pa e personanan cu na e momento ey tabata riba caya. Ban wak ken por ta corda e sucedido aki!
Oranjestad: Diahuebs 12 di januari 1978, net poco prome cu 12’or di merdia, un truck di carga cu un trailer patras a sali di for di Waf.
Trucknan di carga riba waf
Truck di carga cu un trailer cu 9 toro y baca
Den e trailer tabata tin en total 9 toro y baca. E bestianan aki a caba di yega for di riba un boto di carga, procedente di Colombia, nan a wordo cumpra pa un carniceria na Aruba.
Na caminda pa abatoir trailer a bolter
E truck cu su trailer a sali y tabata bayendo direccion di abatoir. Abatoir tabata keda e tempo ey net patras di ex edificio di D.O.W, actualmente unda e parkeerplaats ta.
Unda antes tabata abatoir, loke a resta di e cura di abatoir, awendia ta un parkeerplaats
Un poco mas pabou di ex edificio di D.O.W. e trailer cu e 9 bestianan den dje, pa un of otro motibo a bolter 8 di e animalnan aki a logra scapa. Un toro a keda pega bou di e trailer, e otronan a cuminsa core bay direccion pabou dus direccion di Eagle.
Ex edificio di D.O.w.
E tempo ey warda di polis tabata hopi cerca, caminda e Hotel Renaissance actualemente. Hopi lihe polis a yega na e sitio unda e trailer a caba di bolter.
Warda di polis antes na Oranjestad
Toro furioso a sali for di bou di e trailer
Na momento cu e agentenan a bay puntra e chauffeur kiko a pasa cu e trailer a bolter, pa nan sorpresa e toro cu tabata pega bou di e trailer a logra lanta y a sali furioso core bay direcion pariba esta direccion di Bestuurskantoor. Net e momento ey tabata tin hopi hende riba caya, hopi hende tabata na Waf ta cumpra fruta, pisca y carni.
Bendemento di pisca riba waf
Bendemento di fruta riba waf
E toro furioso cu a sali for di bou di e trailer
Caos y panico den Oranjestad
E toro a duna tur hende eybanda e susto di nan bida. Segun un testigo a conta cu hendenan tabata crusa caya sin pone tino riba auto. Automobilistanan tabata kita un banda pa no dal hende y e otro banda pa no dal e toro, un caos completo den e ora di merdia, net na momento cu negoshinan den Oranjestad tabata cerando pa hendenan bay cas merdia pa come.
Baca y toro na careda riba beach, unda turistanan tabata drumi ta tuma solo
Mientras cu tur hende nan atencion tabata riba e toro banda di Bestuurskantoor. E otro 8 baca y toro nan a bay direccion di Hotelnan y hospital. Riba e beach na Divi Divi Beach Hotel, (actualmente Divi All Inclusive), algun turista cu tabata tumando solo y relahando riba beach a wordo sorpresa pa tres toro, e toronan a subi e beach na careda, e turistanan di susto a bula lanta pa e toronan no pasa trapanan.
Beach Divi Aruba Beach hotel
Nan a drenta lama
E bestianan tabata asina spanta y no tabata sa kiko pa haci, na careda tur tres a drenta lama. Lamentabelmente un rato despues dos so a logra sali bin tera, e otro a hoga. Probablemente nan lo a pensa di bay direccion di nan pais natal cu tabata Colombia. Polis a bay riba e beach y a tira tur dos mata. Un rato despues riba e Beach banda di Aruba Beach Club, nan a bin topa cu e otro toro morto.
Un di e toronan cu a wordo tira mata riba Beach banda di Divi Aruba Beach Hotel
Polis a tira toro mata
Mientras tanto e toro den Oranjestad ainda tabata keiro banda di bestuurskantoor.
Area di Bestuurskantoor 1978
Esaki a wordo cera pa un chubato (tractor/bulldozer) hunto cu un otro truck y asina polis a logra los algun tiro den direccion di e animal y esaki a muri mesora.
Polis tirando riba e toro den Oranjestad
Un rato despues dos baca a wordo haya den cura di e tempo ey Antraco N.V. riba Boulevard, e dosnan aki tabata mas calmo y a bistinan un las y a hibanan abatoir.
Dilanti di e cura di Antraco N.V. caminda a haya dos baca mas
Mientras tres toro mas a wordo tira door di polis, den area di Boulevard. En total polis a mata 6, dos a keda bibo y un a hoga.
E tempo ey carni afgekeurd tur atardi tabata wordo benta na Boca Mahos. E dia ey 4 toro cu a wordo tira pa polis a wordo benta na Boca Mahos. Mientras dos so nan carni tabata bon pa come.
Bala di scopet no ta daña e carni
Segun e keurmeester di e tempo ey a splica cu e bala di e scopet no ta daña e carni, pero SI mester tin un hende cu mesora despues cu e bestia wordo tira, nan corta su nek pa e sanger basha, esaki a sosode solamente cu dos di e toronan cu polis a tira, un hende presente mesora a corta nek di e toronan aki pa scapa e carni. Lastimamente cu na momento cu polis a tira e 4 otronan no tabata tin niun hende cerca pa di biaha a corta nan garganta pa scapa e carni.
Antes e carnicerianan tabata importa bestianan bibo for di exterior manera den e caso aki, 9 toro y baca for di Colombia, Esakinan tabata destina pa e Carniceria Tonk, cu tabata situa den Kerkstraat.
Actualmente e ex edificio di Carniceria Tonk den Kerkstraat
E bacanan mester descansa bon prome cu nan por wordo mata
E tempo ey abatoir su regla tabata, cu ora un baca of toro bin di un biahe largo riba lama, e ta wordo poni minimo 24 ora den un cura na abatoir, pa e descansa. Despues cu e ta bon descansa e ora e por wordo mata, esey ta pa e carni wordo bon gekeur. E baca y toronan den e caso aki tabata cansa caba di e biahe largo riba lama y pa colmo ora nan tabata na caminda pa abatoir di golpi nan a haya un libertad cu por ta nunca nan a yega di conoce y como bestia cu ta inocente a cuminsa core rond.
Cuater plus esun cu a hoga a bay pa cria pisca
Un final tristo pa 7 toro cu baca, dos a scapa di morto e momento ey pero na final toch nan a wordo mata pa carni. Dos di e toronan cu a wordo tira a logra scapa e carni. E carnicercia a logra scapa menos cu mitar di su pedido, cu ta carni di 4 toro y baca. E otro cuaternan y esun cu a hoga a bay pa cria pisca na Boca Mahos.
Sharkwatch
E tempo ey casi tur atardi 3’or e trucknan di D.O.W tabata bay rumbo di Natural Bridge y na Boca Mahos nan tabata benta tur carni cu a wordo afgekeurd y tambe bestia morto den lama. Algun hende tabata pendiente di e trucknan aki. E bentamento di carni y bestia morto na Boca Mahos tabata manera un actividad riba su mes, e tabata atrae hopi hende, te cu e la haya e nomber di Sharkwatch, pa motibo cu ora cu nan tira carni den lama bo por mira pisca grandi y tribon eybou.
Semper tabata tin hende para na e rand di Boca Mahos pa wak si nan ta mira tribon of otro pisca grandi den e Boca. Door di tira e carni tabata criando e tribonnan y otro piscanan grandi. Aparentemente pa e motibo aki hopi tribon a cuminsa yega mas cerca di costa y nan tabata sa e ora exacto cu nan mester bay na Boca Mahos pa nan come.
Esaki ya pa hopi decada no ta wordo haci mas, aparentemente tabata tin varios motibo cu a stop e bentamento di carni y bestia morto den lama. Un di e motibonan tabata cu ta benta carni contamina den lama, pero tambe tin hende ta bisa cu piscanan grandi, manera tribon tabata cuminsa yega mucho cerca di nos costa y sigur como un isla cu e tempo ey caba tabata promove su mes como un destinacion turistico, no por a permiti su mes pa sigui cu e acto aki, formando peliger no solamente pa su hendenan pero tambe pa su bishitantenan cu ta bin especialmente pa e lama.
Pa evita bentamento di carni contamina den lama y tambe pa evita cu tribonnan ta sigui yega mas cerca di nos costa a para e actividad di Sharkwatch aki na Boca Mahos.
Fuente: Prome/ testigo Foto; Facebook/ Evert Bongers