Home Politics Minister Marisol Lopez -Tromp: Entrante dialuna DIP ta inicia cu re-inscripcion...

Minister Marisol Lopez -Tromp: Entrante dialuna DIP ta inicia cu re-inscripcion y inscripcion pa tereno huurgrond

SHARE

Gobierno ta inicia cu maneho pa stimula economia local a traves di sector agricultural

Aworaki Aruba ta den un situacion caminda caminda cu nos pilar economico, cual ta Turismo, ta grandemente afecta. Esaki como consecuencia di e pandemia COVID-19 cu ya desde maart ta afecta nos isla. E situacion aki ta accentua e hecho cu Aruba mester otro desaroyo y/of pilarnan economico. Den cuadro di esaki Departamento di Infrastructura y Planificacion (DIP) ta lansa su maneho nobo pa loke ta tereno di huur (huurgrond).

Te cu awor Aruba a depende semper di importacion di productonan alimenticio. ‘Food security” ta un aspecto sumamente importante pa nos economia y cu nos mester atende dibiaha den e circumstancianan cu nos ta aden. Minister Marisol Lopez – Tromp ta accentua cu e caida di importacion di fruta, berdura y pisca for di Venezuela desde 2017 pa motibo di e crisis politico/economico di Venezuela, conhuntamente cu e situacion actual di nos salubridad publico regardando e COVID-19, ta mustra con vulnerabel Aruba ta cu e parti di alimento.

Gobierno den e caso aki tin e vision pa localmente ‘nos mes’ produci productonan alimenticio na un escala mucho mas grandi cu locual ta produci actualmente. Esaki ta un di e sectornan prometedor cu Gobierno a stipula den su maneho economico di aña 2019 pa aña 2022. Den cuadro di esaki, DIP kier stimula e sector aki por medio di uza e “huurgronden” hopi mas eficiente y efectivo.

Adaptacion di maneho
Pa crea y apoya nos Sector Primario den forma sostenibel, nos mester stimula formalisacion y crecemento di negoshinan chikito y mediano. Pa e motibo aki DIP ta adapta e maneho di e documento di tereno di huur pa sector primario. Entrante dialuna awor lo tin oportunidad di re-inscripcion pa tur persona aki na Aruba of compania cu den pasado a haci un peticion di “huurgrond” pa sector primario y persona of compania cu a haci peticion pa extension di acuerdo cu lo por a vence.
Ta reconoce cu tin cunukeronan y hendenan cu ta planta pa hopi aña caba. DIP ta anuncia alabes cu tin e oportunidad pa inscripcion nobo, specialmente pa esnan cu aworaki ta desea di inicia cu plantamento. Pues pa persona y companianan cu no a yega di entrega un peticion formal na DIP ainda, dialuna en adelante por haci esaki.

Pa resumi, tur persona interesa den un tereno di huur pa planta productonan alimenticio, por haci esaki entrante 20 di april te cu 20 di mei proximo. Por acudi na e website www.dip.aw caminda lo encontra e formularionan di inscripcion y re-inscripcion nobo. Conhuntamente cu tur informacion necesario pa completa e peticion.

Por ultimo, Teniendo na cuenta e situacion di “Shelter in Place”, ta recorda cu e departamento DIP ta cera pa publico, sinembargo lo tin personal trahando pa atende cu e peticionnan. Pues ta haci un yamada na tur persona interesa pa haci bon uzo di e oportunidad. Dialuna durante rueda di prensa di Gobierno, lo presenta mas informacion relevante.