Bloemond – Diahuebs merdia algo pasa di 1’or varios patruya a bay Bloemond Supermarket, unda un persona lo a reconoce un cantidad di Power Tools horta algun dia atras na un cas den construccion situa na Jaburibari.
Ariba di dos dia Pasco algun persona buscando nan articulonan horta a mira cu ariba e page di Vraag en Aanbod e articulonan aki horta a aparece.
Pa nos haci e storia cortico, mesora e doñonan a traha un contacto cu e ladronnan.
Y pa mas o menos 900 florin tawata cla pa laga tur material bay.
A acorda un luga pa nan topa y asina supuestamente cumpra tur cos. E meeting place tawata Bloemond Supermarket.
Pero, mientrastanto esnan cu a bira victima di e ladronicia a bay warda di Shaba y a pone Polis na altura di tur loke ta pasando y cu e deal lo bay ON den algun minuut na Bloemond.
Ey ta unda tur patruya cerca a wordo notifica y a Standby pa asina cu e doño/intermediador reconoce e articulonan nan lo drenta accion y detene tur hende.
E plan a bay manera acorda y una bes cu a reconoce e articulonan polis a yega y blokia e Toyota Tercel.
Den e auto tawata tin tres persona, dos homber y un muhe.
Un di nan cu ta conoci di polis di fam Felicia y cu ta biba cerca a purba core, pero mucho leu e no a yega paso polis a gare.
Un bon trabou di dos agente di Noord y un agente di trafico cu tawata cerca a sa di domina e situacion mesora y detene tur hende.
Patras den e bahul a bin haya varios tools caro cu ta procedente di ladronicia, esta di un cas den construccion situa na Jaburibari.
Un di e personanan deteni ta un empleado di Riu Hotels y lo tawata bayendo su trabou, por mira su uniform patras.
No ta conoci si e tawata “At the wrong place wrong time”, of e tambe ta directamente envolvi den e caso. Mester remarca cu e cabayero aki tawata full trankilo y no tawata mustra nada di ta spanta of ansha.
Tur hende a wordo deteni y transporta den patrouille wagen y transportwagen direccion Warda di Shaba.