Ayera Minister di Asuntonan Economico, Financiero y Cultura a bishita Parlamento den un openbare bijeenkomst na unda el a brinda informacion riba e rapport “Najaarsnota 2019”. E rapport aki a wordo brinda na Parlamento anticipando riba tratamento di presupuesto supletorio cu lo mester tuma lugar den luna di december benidero.
Resultado di e saldo financiero miho cu a anticipa pa 2019
No ta ningun secreto cu Aruba su finansas publico tin su retonan extremo desde gobernacion di AVP bou liderasgo di Mike Eman te cu pais Aruba mester a acepta supervision financiero desde 2015. A consecuencia di esaki gobierno actual bou liderazgo di sra. Evelyna Wever-Croes ta den un lucha continuo pa re-establece confiansa tanto di pueblo como di Hulanda pa demostra cu awor si tin un gobierno cu tin pais Aruba y maneho financiero duradero na serio y ta asumiendo e responsabilidad aki cu madures. Sin menciona cu e Prome Minister actual tin e capacidad propio di e materia conhunto cu Ministerio di Finansas y Economia.
Segun informacion ricibi den presupuesto 2019 aña pasa pero tambe den e “Financieël Economisch Memodrandun” (FEM), Aruba a proyecta cu aña 2019 lo cera cu un deficit financiero di 24.75 miyon florin. Parlamentario Setty Christiaans-Yarzagaray ta elabora cu awor segun informacion ricibi den e Najaarsnota 2019 tur cos ta indica cu pais Aruba lo cera e aña 2019 cu un deficit di 19.99 miyon. Pa e Parlamentario esaki ta muestra cu e gobierno actual ta asumiendo su responsabilidad y ta cumpliendo cu loke a bin ta bisa Parlamento y hasta ta finalisa e aña cu miho resultado cu anticipa.
Ta anticipa cu aña 2020 lo termina cu un surplus despues di 12 aña
Gobierno actual bou liderazgo di Prome Minister sra. Evelyna Wever-Croes hunto cu Minister di Finansas y asuntonan Economico y Cultura y su bureau tin 2 aña tras di lomba trahando duro pa asina finansas publico drenta bek den curso manehabel.
Resultadonan di pasado ta demostra con teribel e maneho cu e gabinete di signatura berde a resulta mirando cu nan a priminti pueblo den inicio di nan gobernacion na 2009 cu nan lo gasta hopi placa cu e meta cu esaki lo tin un “spin-off effect” riba economia cu no a resulta. No solamente e no resulta pero tambe nunca a evalua y re-dirigi nan strategia prome cu hinca Aruba den tanto debe y problema. Hasta por corda cu e prome minister anterior, Mike Eman, a papia di “eerst bloeien dan snoeien” siendo cu nunca e tawata tin e curashi pa snoei pa evita por ehempel un CAFT na 2015.
Den a tabel adhunto por tuma nota di saldo financiero (financial deficit) desde 2001 te 2018 y proyeccion di 2019 y 2020. Aki por nota claramente e sumanan di deficit den tempo di AVP durante 2009 pa 2017. Por nota sumanan di deficit astronomico di 443.8 miyon den 2012, 405.8 miyon deficit na 2014, 332.8 miyon na 2013 y 325.2 miyon deficit na 2011. Por resumi cu di 2010 te cu 2017, gobierno di AVP a crece e debe di Aruba cu 2,2 biyon florin. E peticion di Parlamentario Setty Christiaans-Yarzagaray na pueblo ta, mirando cu e aña aki apenas a cuminsa paga proyectonan di caminda (PPP), hospital ainda no a cuminsa paga y algun proyecto a sali di FDA, si wak rond na Aruba di 2010 pa 2017, unda por wak unda 2.2 biyon florin a bay?
Gratitud ta bay na pueblo di Aruba!
Pa gobierno “turn around” finansas di pais Aruba den menos di 2 aña di tempo sigur tawata tin su retonan y por solamente duna danki na pueblo di Aruba pa e comprension y sosten mirando cu pueblo tambe ta sinti e efecto di mester asumi e retonan aki. Sigur no por bisa cu ta cu orguyo nos tur mester paga e prijs aki awe paso por a evita hacie otro si solamente tawata tin politiconan den e añanan 2009 pa 2017 cu mas curason pa Aruba.
Tin di felicita gabinete Wever-Croes den su totalidad mirando cu sigur esaki tawata un esfuerso tambe di ful un ekipo mustrando cu hunto nan a asumi e retonan pa re-establece trankilidad y confiansa cu na Aruba tin hende capas y responsabel.
Ohala cu e resultadonan aki, por wak dilanti na mas desaroyo positivo y cu awor si por cuminsa traha riba algun punto cu a wordo menciona den campaña manera rebaho di prijs di coriente y awa of hasta reduccion den edad di pensioen. Masha pabien na pueblo di Aruba!