E vision di Gabinete Wever-Croes for di cuminsamento tabata pa duna P’Ariba di Brug su prioridad mereci y cu lastimamente no a haya pa decadanan. Y awe nos por mira claramente con e vision di Gabinete Wever-Croes pa cu San Nicolas ta cristalisando y traduciendo den un progreso indudabel, cu lo ta na beneficio di nos Pais en general.
E proyecto di Baby Beach Waterfront ta un otro muestra di e compromiso di nos Gobierno pa trece un progreso real pa nos Aruba. E desaroyo cu ta tumando lugar na San Nicolas ta yenando nos hendenan cu speransa pa un mihor futuro. Maske nos Gobierno tin cu enfrenta retonan incalculabel y hasta increibel pa hopi, nos ta un ekipo di hombernan y muhernan cu ta trahando incansabelmente pa logra un unico meta: un mihor Aruba pa un y tur!
E dianan aki San Nicolas ta den ‘spotlight’ yamando bon bini na proyectonan prometedor y realistico cu lo pone Aruba su nomber resona mundialmente como atractivo turistico. Y esaki ta algo cu nos mester sigui lucha pa logra den conhunto, pasobra na final di dia nos pilar economico principal ta y lo keda turismo.
Mi kier felicita y gradici colega Minister Dangui Oduber kende ta ehecutando un vision cu nos a mira como un soño for di nos tempo como Parlamentario. E ta un trabou duro pero como Gabinete Wever-Croes nos ta para hunto firmemente pa sigui traha hunto pa un mihor futuro.