ORANJESTAD –Diahuebs anochi Aruba One Happy Island Lions Club hunto cu Dr. Dellanire Maduro a organisa un Charla Interactivo na MFA Paradera cu tabata tin como tema “Diabetes kico bo sa di diabetes y cuanto riesgo bo ta core pa haya diabetes ?”.
Despues cu e presidente di Aruba One Happy Island Lions Club a yama e publico un bon bini y a splica riba e tres actividadnan realiza pa e organisacion relaciona cu Dia Mundial di Diabetes a introduci Dr. Dellanire Maduro kende ta un colaborador pa 2 aña caba di Aruba One Happy Island Lions Club. Dr. Maduro a duna un excelente presentacion cu hopi informacion balioso y educativo riba e malesa di Diabetes conscientisando esnan presente riba un alimentacion saludabel y un bida activo.
Danki na e cooperacion di IBISA, Mediconan di Region Dr. Croes y Dr. Rangel cu a haci control di suco, a check peso, estatura y calcula e BMI di e participantenan. Como tambe a reparti foyeto cu informacion. Dokter Maduro a duna un presentacion y a haci test di conocimento via sistema digital cu e participantenan. Otro parti tabata caminda a presenta na e participantenan diferente productonan cu ta wordo consumi diariamente y a siña nan con pa lesa e cantidad di sucu cu nan ta contene y a compara cu otro producto pa asina nan tin un mihor conocimento pa hiba un alimentacion mas sano posibel. Mirando cu ta acercando dianan di fiesta a duna tips con pa alimenta na un forma mas saludabel y balansa. Esnan presente tabata e oportunidad amplio pa haci pregunta y Dr. Maduro a sa di contesta e preguntanan haci y a duna splicacion amplio caminda esaki tabata necesario. Durante e charla a reparti awa cu appelsina fresco y tambe a reparti na tur esnan presente un dushi cup cu sopi di pampoena.
Aruba One Happy Island Lions Club ta gradici Dr. Dellanire Maduro pa su gran colaboracion y contribucion na yuda organisa e 3 exitoso actividadnan e aña aki relaciona cu Dia Mundial di Diabetes cualnan tabata e presentacion “Diabetes y Nutricion” na scol basico Paulus School, reparticion di appel cu mensahe educativo na automobilistanan y por ultimo e charla interactivo.
Como un muestra di aprecio y gradicimento a entrega Dr. Dellanire Maduro un bunita recuerdo. Na final a gradici tur e participantenan pa a yuda haci tambe e charla uno exitoso y a haci un apelacion na tur e participantenan pa nan comparti e informacion ricibi den nan circulo di famia, amistad y coleganan di trabao pa asina hunto nos combati e malesa di Diabetes y tin un comunidad mas sano y activo.