Diaranson Minister encarga cu Infrastructura Otmar Oduber acompaña pa Director di DOW Marlon Croes y Pastor Toti di Misa St. Filomena, a anuncia e inicio di trabounan di embeyecimento di tereno rond di Misa na Paradera. E trabounan ta encera parti di tereno di Gobierno y parti di tereno di Bisdom. E proyecto lo tin un duracion di 3 luna mas o menos y ta tin un inversion di 1.1 miyon florin cu ta encera mehoracion di e infrastructura pa aumenta accesibilidad na e misa y scolnan den bisindario. Pastor a keda sumamente contento cu anuncio di inicio di e proyecto considerando cu ta un aña special, cu e celebracion di 70 aña di misa St. Filomena.
Mescos cu a tuma luga recientemente rond di misa na Oranjestad, Gobierno di Aruba a mira e necesidad den barionan pa sigura calidad di bida di hende. E misa di Paradera ta rondona cu dos scol cu ta directamente comparti e area cu tin cu misa. Pa cual a firma acuerdo entre Bisdom y Gobierno caminda cu e Parkinglot y tereno rond di e misa ta keda habri pa wordo uza durante di e proximo cinco añanan na forma publico, pues pa mayornan y muchanan di scol tambe.
Hopi biaha ora cu tin scolnan rond y tin acumulacion di personanan cu ta bishita misa, e ta importante pa percura pa ordena e area pa percura pa siguridad di cada persona y pa regula e trafico den e area. Pesey ya pa algun luna DOW tabata encamina e proceso den forma transparente pa yega na e destaho pa cual Arubaanse Wegenbouw Maatschappij lo ta esun encarga cu e proyecto aki. E proyecto ta conta cu un inversion di 1.1 miyon florin, cual ta bay na eleva e calidad di bida y experiencia den e area. Ta calcula cu e trabounan lo tin un promedio duracion di tres luna (lo tuma un pauze december, pa continua januari).