ORANJESTAD – E aña aki, mundo henter ta para keto na e momento historico cu a tuma lugar 30 aña pasa, na unda lider mundial a yega na un acuerdo den un asamblea general di Nacionnan Uni cu globalmente lo salbaguardia e bienestar di tur muchanan pa medio di e Tratado di Derecho di Mucha. E tratado aki ta un di e tratadonan di derecho humano ratifica dor di mas pais na mundo. Tin hopi mas atencion pa proteccion di mucha pa nan por desaroya na nan maximo potencial pa medio di e 54 articulonan den e tratado. Nos por wak bek riba un transformacion den bida di nos muchanan rond di mundo, ehempel di esaki ta un reduccion di 50% di mortalidad di mucha bou di 5 aña, mesun cos ta conta pa disminuicion di e cantidad di mucha malnutri y un aumento den e cantidad di mucha cu tin aceso na awa limpi pa bebe. Esaki djis pa menciona algun di e avancenan raporta dor di UNICEF.
Na aña 2001 Aruba tambe a firma e Tratado aki, haciendo asina e compromiso pa proteha, di un forma mas completo posibel, e mucha pa medio di e diferente articulonan specifica den e tratado. E mesun aña ey, gobierno di Aruba a instala e Comision Nacional Derecho di mucha pa percura cu e cumplimento di e Tratado ta sosode na un forma coordina y eficiente. E comision Derecho di mucha ta consisti di 8 organisacion gubernamental y 2 organsacion no-gubernamental.
Sinembargo ainda tin trabou pa haci, si nos wak e situacion aki na Aruba mes, ainda awe tin mucha ta biba un of otro forma di violencia. Gobierno di su parti a pone e punto aki halto riba agenda pa medio di e Crisisplan Social. Un plan cu tin 31 projecto dirigi specificamente pa mehora e situacion di nos muchanan.
Pero ta tuma mucho mas cu e boluntad di un gobierno pa logra un generacion caminda tur mucha tin tur derecho. E ta un compromiso cu mester ta carga dor di tur sector y tur grupo den nos sociedad. Na Aruba tin hopi inciativa pa pone e atencion riba e bienestar di nos muchanan pa medio di e tratado. Den enseñansa, maestronan di scol ta haci esfuerzo extra pa educa e muchanan mes, pero tambe tin iniciativa for di e area di deporte y for di e diferente fundacionnan cu ta haci trabou incansabel pa promove e derechonan. Sin lubida sector priva cu na diferente forma ta mustra nan sosten. P’esey awe Comision Derecho di Mucha ta sumamente contento pa por comparti cu pueblo di Aruba, e cooperacion cu Bright Bakery na ocasion di conmemoracion di 30 aña di e Tratado Derecho di Mucha. Manera ya conoci, Bright Bakery ta un compania local cu ta na mas cu un ocasion a mustra su contribuicion na temanan relevante den nos comunidad tanto riba tereno di deporte, social y cultural. Awe ta otro ehempel di esaki. Entrante dialuna 4 di november y pa henter e luna di november, e productonan di Bright Bakery lo ta den un saco cu tin un diseño special en coneccion cu Derecho di mucha. Parti padilanti di e saco por wak naturalmente e logo di Bright bakery, pero tambe 9 derecho cu ta den e tratado. Mas abou por mira e website: www.derechodimucha.org. Riba e website por haya tur informacion tocante e 54 articulonan den e tratado na tres diferente idioma, Papiamento, Hulandes y Ingles. Por lesa tambe e raportahenan entrega na Nacionnan Uni y e recomendacionnan cu Aruba a ricibi. Parti patras por lesa informacion nutricional, pero tambe algun idea con por habri un combersacion tocante e topico aki cu un mucha. E aña aki nos ta añadi un pagina di Facebook na e medionan di comunicacion, pues entrante awe lo tin informacion tambe riba e pagina “Derecho di mucha Aruba”.
Esaki no ta tur, pa culmina e cooperacion cu Bright Bakery den grandi mi kier pasa palabra pa Stephanie Nucete pa duna mas informacion tocante kico mas lo tin durante e luna di november.