Ta trata un caminda cu pa basta tempo tabata merece atencion. Un di e Metanan di Gobierno ta duna oido na necesidad di comunidad, pa cual por tuma nota di e cantidad di camindanan cu ya a wordo drecha! Elevando calidad di bida di e ser humano. Den e bario aki tin personanan bibando ‘cera den cas’ pa mas cu 30 aña, awor porfin ta ricibi alivio di stof!
Minister encarga cu infrastructura Otmar Oduber a splica cu e criterianan stipula pa cual ta duna prioridad na cierto barionan ta encera entre otro barionan hopi habita cu tin bastante fluho di automobilista, situacionnan di emergencia y tambe camindanan den sumamente mal estado. Algun siman pasa trabou a tuma luga na Hooiberg caminda cu tambe tabata trata un caso caminda cu hopi hende ta haci uzo di dje.
Durante e ultimo decada no tabatin atencion riba careteranan di santo den mal estado cual a crea un situacion di defecit grandi! Esaki Gobierno actual ta atendiendo cu ne awor. Ademas como parti di e maneho, ta percura pa drecha camindanan di asfalt den barionan cu tambe ta den sumamente mal estado.
Comunidad mes a traves di medionan social y den corant por a tuma nota di e trabou continuo di DOW tur rond di Aruba. Mester menciona cu cada biaha cu drecha caminda, cartanan ta drenta cerca DOW cu firma di mas bario cu tambe ta desea di mira nan camindanan drecha. Liña cora di Gobierno ta ser humano central y pa eleva calidad di bida di e ser humano. Esaki tambe ta encera percura cu personanan por tin caminda asfalta, cual ta necesario pa percura pa e aspecto di salud di nos hendenan.