ORANJESTAD: Diasabra, 8 di juni 2024, campeonato di FIFA World Cup Qualifiers a tuma luga den Compleho Deportivo Guillermo P. Trinidad na Dakota. Presente den e ocasion aki tabata Su Excelencia Gobernado di Aruba Alfonso Boekhoudt hunto cu Minister di Enseñansa y Deporte Endy Croes, colega Minister di Enseñansa, Ciencia, Cultura y Deporte di Corsou Sithree van Heydoorn, Minister Ruthmilda Larmonie di Corsou, Vice Prome Minister di Aruba Ursell Arends, Minister di Finansas y Cultura Xiomara Maduro, Minister di Turismo y Salubridad Dangui Oduber, Minister di Husticia y Asuntonan Social Rocco Tjon, Parlamentario Alvin Molina y Marco Berlis, director di Arubaanse Voetbal Bond (AVB) y demas invitadonan special. Tabatin un gran fanaticada den Compleho Deportivo Guillermo P. Trinidad. Alrededor di 3 mil hende a bin pa presencia e wega clasificatorio entre Aruba y Corsou. Despues di diesdos (12) aña, Seleccion Masculino di Aruba a hunga bek na cas. Manera ta conoci, Aruba no tabatin un stadion cualifica pa FIFA y CONCACAF. Pa e motibo aki, a renoba e stadion completamente pa cumpli cu e standardnan internacional. Despues di e wega di diasabra, e avancenan den stadion ta continua. Finalmente, e mandatario di Enseñansa y Deporte a indica cu e tabata un tremendo hugada, unda Seleccion di Aruba a entrega cuerpo y alma riba veld. Den e di dos tempo, yegando final di e partido, Seleccion di Corsou a logra score Aruba 2-0. Minister Endy Croes ta felicita nos Seleccion Nacional cu a haci un gran trabou riba veld. Alabes, ta felicita Seleccion di Corsou cu a hiba e victoria. Minister Endy Croes ta indica cu e echo cu Seleccion di Aruba por a hunga bek na cas den un wega clasificatorio despues di tanto aña, ta un logro grandi pa Aruba y ta gradici Gabinete Wever-Croes II, Fundacion Lotto pa Deporte (FLpD) y tur cu a haci esaki posibel. Pabien Aruba cu e gran logro aki.