ORANJESTAD: Recientemente, Minister di Enseñansa y Deporte Endy Croes a ricibi e miembronan di International Federation of Kyokushin Karate (IFK) na Bestuurskantoor. Durante e encuentro, e representantenan a splica di e exitoso IFK Aruba Spring Kyokushin Camp, un evento di cuater (4) dia cu a tuma luga na diferente luga riba nos isla, alabes a enfatisa riba e entrenamento duro di Kyokushin, disciplina y entusiasmo cerca tur participante.
Sr. Shihan Sean Schenker di IFK Merca y Sensei Sr. Zairo Ruiz di IFK Aruba a duna un resumen di e actividadnan durante e camp. E evento, cual a ser organisa den colaboracion cu Tokon Dojo, a mustra e espirito berdadero di Kyokushin Karate, un forma di arte marcial di contacto completo conoci pa su enfasis riba e forsa fisico y resistencia mental. E camp a ser guia pa Shihan Sean Schenker (5de dan), Sensei Zairo Ruiz (3de dan) y Senpai Jonathan Gonzalez (2de dan) di IFK Costa Rica, kende ta un bringado renombra cu a gana un gran cantidad di campeonatonan internacional rond di mundo. Tokon Dojo ta conoci na nos isla pa ofrece les di Kyokushin Karate gratis pa mucha, a hunga un rol importante den e camp como organisado principal. E instructornan di e dojo, Sensei Zairo Ruiz y Senpai Brian Marchena a splica di e impacto di e camp riba e partcipantenan y e beneficionan di Kyokushin specialmente p’e hobennan.
Minister Endy Croes a expresa su admiracion pa e dedicacion di e organisado- y instructornan, reconociendo e influencia positivo cu e eventonan aki tin riba e comunidad deportivo. E mandatario di Deporte a enfatisa riba e importancia di deporte y arte marcial den e desaroyo di individuonan y a reforsa e compromiso di su Ministerio y Gobierno di Aruba pa apoya iniciativanan cu ta promove un bida mas saludabel, disciplina y intercambio di conocemento internacionalmente, mirando cu e camp a ricibi bishitantenan di Merca y Costa Rica.
Na final di e encuentro, Minister Endy Croes a felicita nan pa e proyecto exitoso y a haci entrega di un bunita recuerdo den forma di un medaya di 4D esta, deseo, disciplina, dedicacion y determinacion.