Durante e luna di juni, lo dedica atencion na limpiesa di Caya Betico Croes den Oranjestad. Durante e luna aki Minister Geoffrey Wever a pone fondonan disponibel pa tene un limpiesa completo di Caya Grandi te na haltura di Plaza Habibe.
“Pa ya un tempo caba mi tabata ricibi kehonan di e estado di limpiesa den nos centro di ciudad y mi tambe ta consciente di esaki.” Awo, Caya Grandi a yega na beurt. Lo ta haciendo limpiesa di Caya Betico Croes, haciendo mantencion ariba tur e matanan den Caya Grandi y alavez lo cuminsa reemplasa e 50 barinan di sushi cu barinan nobo cu dobel e capacidad. Tur e esfuersonan aki ta pa yuda mantene nos ciudad mas limpi.
For di 2021, aunke cu fondo limita, ta trahando pa haci Oranjestad un ciudad mas atractivo y vibrante. Fase 1 di e revitalisacion di Columbusstraat y Wilhelminastraat a keda cla den 2023 y recientemente a finalisa Fase 2 di e area aki. Un parti importante pa revitalisa e area di Wilhelminastraat tambe ta e restauracion di e edificio iconico den nos ciudad, manera Cas Veneranda. Aruba Fair Trade Authority (AFTA), cual a wordo establece e aña aki, tambe ta ubica den un otro edificio iconico den centro di ciudad, den Oranjestraat, y asina sigui duna balor y bida bek den nos centro di ciudad. “Tur esaki ta parti di un strategia holistico cu nos a compromete na cuminsamento di e periodo di gobernacion”, e mandatario a menciona.
“Mi ta invita tur habitantenan y bishitantenan pa tuma parti den e proceso di limpiesa y juda manetene nos ciudad limpi. Cu bo sosten y colaboracion, nos ta sigui traha pa un Oranjestad mas limpi, atractivo y bunita.”