ORANJESTAD: Durante Premio Excelencia den Deporte diabierna anochi, a reconoce baluarte deportivo Sra. Milburga “Mila” Martinus pa contribui gran parti di su bida den e desaroyo di deporte di Aruba.
Milburga Martinus, miho conoci como Mila, a nace dia 23 februari 1959 na San Nicolas, Aruba. Sra. Mila ta un gran baluarte di softball di Aruba y Antiya, medayista di oro. Mila a practica e deporte di softball di 1968 te cu 2018, pues durante 50 aña. Ademas di softball, Sra. Mila a destaca den e deportenan di volleyball, basketball y futbol. Sra. Mila a cuminsa hunga softball na aña 1968 cu 9 aña di edad cu S.V. Plymouth cu despues a bira S.V. Plymouth/Coca Cola, cu su tata dft Edilio “Palo Bieu Pagigi” Martinus como manager y su mama dft Sra. Susanna “Mama Tesha” Martinus, como un di e miho pitchernan cu Aruba y Antiya a yega di conoce.
Na aña 1976 tempo cu Sra. Mila tabatin 17 aña di edad, a wordo selecta pa hunga den Seleccion di Antiyas den Campeonato Centro Americano y del Caribe na El Salvador, di cual nan a gana Mexico, logrando medaya di oro. Mila ta un di e tres personanan di Aruba cu riba nivel di campeonato a logra medaya di oro den e disciplina di softball. Despues di esaki, Sra. Mila a cuminsa hunga cu Seleccion di Aruba, unda cu a biaha diferente pais y a laga Aruba su nomber den halto.
Na aña 2011 Sra. Mila a dicidi bin cu un Campeonato Internacional di 35+. Sra. Mila a duna e campeonato e nomber di Caribbean 35+ Women Softball Tournament, cu awendia ta conta cu ocho (8) team di cinco (5) pais entre otro, Aruba, Boneiro, Corsou, Sint Maarten y Hulanda. Edad ta varia entre 35 pa 65 aña y cada aña un pais ta anfitrion di e campeonato.
Minister Endy Croes ta felicita Sra. Mila Martinus cu su gran logronan. Danki pa contribui enormemente den e desaroyo di deporte di Aruba y pone Aruba su nomber briya. Aruba ta hopi orguyoso di bo.