“E cancha di basketball completamente renoba den centro di village, por haci un diferencia den e calidad di bida di nos hobennan”
ORANJESTAD – Diabierna ultimo a tuma luga e inauguracion di e cancha di basketball completamente renoba den centro di Village na Sanicolas. Na e ocacion aki, Prome Minister Evelyn Wever-Croes tabata tin e honor di duna un discurso, na unda ela indica cu Gobierno di Aruba, a traves di Minister di Deporte Endy Croes, ta haciendo tur clase di esfuerso pa bin cu proyectonan, cu por haci un diferencia den e calidad di bida di nos hobennan.
Prome Minister a splica cu Aruba ta den recuperacion. E economia a yega nivelnan di prome cu pandemia, finansas ta dunando mas espacio pa cumpli cu compromisonan financiero y pa inversion, y desempleo ta bahando. Tur esakinan ta indicadornan cu pais Aruba ta bayendo bon, y instancianan internacional ta reconoce esaki tambe. Esaki sigur ta puntonan importante, pero pa un Gobierno lo mas importante ta pa por traha na bienestar di pueblo, biniendo cu proyectonan na beneficio di comunidad.
Importante pa enfatisa ta cu e recuperacion economico di pais Aruba, ta crea espacio financiero pa por cumpli cu proyectonan importante pa e pueblo di Aruba. Pese’y e dia aki ta uno importante, paso e compromiso di Gobierno ta pa bin cu proyectonan den benficio di e pueblo, y e cancha renoba aki, sigur ta un logro grandi pa e hobennan di village cu tin pasion pa e deporte di basketball.
“Mi kier gradici Minister Endy Croes, y su ekipo completo pa haci esaki posibel. Sanicolas tin hopi potencial, y Gobierno tin hopi trabou pa haci den e bario aki. Un biaha mas masha danki, y pabien na e comunidad di Sanicolas cu e hoya di proyecto aki”, Prome Minister a expresa.
