ORANJESTAD: Diadomingo ultimo, Minister di Enseñansa y Deporte Endy Croes a acudi na e show Tur Cos pa Bo, Mi Dushi Aruba na Cage Nightclub. Un show cultural rico na musica, baile, canto y entretenimento pa celebra Dia di Himno y Bandera, organisa pa NTG & NLG – New Timbirichi & Lolipop Generation. Tabatin diferente cantante presente pa deleita e publico cu nan bunita bos entre otro, Mirlaine Vis, Jaylon Machado, Karena Maduro y Jose David Polanco y banda. Ademas di esaki, Mitchel Almary a presenta su bunita cancion titula Agente di Paz. A clausura e anochi cu un magnifico show di Carnaval. E meta di e show cultural aki tabata pa recauda fondo pa hiba e bailarinanan di NLG & NTG Medellin, Colombia pa un tayer (clinic) di baile. Tur hende presente a gosa di e tremendo show cultural y aporta pa hiba nos talentonan local den exterior pa sigui desaroya nan talento. Minister Endy Croes ta gradici Sra. Marisol Peña pa tur su esfuerso, amor y dedicacion cu e tin pa e mucha- y hobennan di NTG & NLG y ta felicita henter e grupo cu e bunita show cultural aki, en conexion cu celebracion di Dia di Himno y Bandera.
