‘Como sosten na proteccion y preservacion di nos naturalesa, y na un desaroyo sostenibel di turismo’
Aruba Tourism Authority (A.T.A.) ta anuncia cu a firma acuerdo di un aña cu Fundacion Parke Nacional Aruba (FPNA). Cu e acuerdo strategico aki, A.T.A. ta reafirma su compromiso pa sigui traha di cerca cu FPNA como un sosten mutuo pa cu esfuersonan continuo den proteccion y preservacion di nos naturalesa..
A.T.A. ta reconoce cu e necesidad pa enfoca riba un desaroyo turistico duradero y sostenibel ta di suma importancia como un esfuerzo comun. Uniendo forsa, nos por garantisa cu nos pilar economico principal ta keda un fuente di entrada vital pa e añanan benidero. E vision di A.T.A. ta basa riba e modelo di ‘High Value – Low Impact’ cu ta para pa un balanse entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’.
Pa hopi aña caba A.T.A. ta provee sosten na FPNA pa cu inversionanan den proyectonan unda turismo y naturalesa por co-existi. Ademas A.T.A. lo sigui pone fondonan disponibel pa mantencion y renobacion di diferente sitionan turistico, asina mehorando seguridad, accesibilidad y experencia di e local y bishitantenan di e isla y alavez maneha e impacto di e bishitantenan riba naturalesa. E acuerdo cu a firma ta enfoca riba proyectonan infrastructural, manera e proyecto di mantencion di railing,trapinan y otro facilidadnan na entre otro Conchi, Dos Playa, Boca Prins, Grot Fontein y Grot Quadirikiri den Parke Nacional Arikok, y tambe lo coloca “boulders” na salinja Malmok pa limita trafico.
Como e entidad encarga cu maneho y mercadeo di nos isla, A.T.A. lo asisti tambe den promocion corecto di experencianan autentico den y rond di e areanan cu ta resorta bou di FPNA. Particularmente lo percura pa alineacion den esfuersonan di comunicación, lo enfoca riba codigo di conducta informando bishitantenan di entre otro reglanan y ley, y lo brinda mas informacion y educacion referente nos parhanan y nos naturalesa.
A.T.A. lo pues sigui traha di cerca cu FPNA pa maneha bishitantenan di un manera cu ta minimalisa daño na naturalesa y medio ambiente mientras ta promove sostenibilidad. Esaki mescos cu a bin ta haci, unda entre otro a inverti den Mangel Halto, y tambe a coloca “boulders” na Sasarawichi.
E colaboracion strategico aki ta nifica tambe cu A.T.A. lo obtene informacion y data mas concreto di bishitantenan atravez di un proyecto nobo cu lo lansa otro luna, esta e eco-counter cu lo midi e fluho di bishitantenan na e areanan natural di Aruba y abilita pa adapta maneho den futuro. Atravez di instalacion di Eco-Counter na diferente localidadnan cu trafico halto di bishitante, A.T.A lo por provee data cu lo yuda cu mihor planificacion. E Eco-counter ta ofrece un solucion cu ta conta y analisa peatón atraves di un scan cu ta garantiza e privacidad di bishitantenan. E areanan cu lo mira instalacion di e Eco-counter ta inclui Conchi, Grot Fontein y Spaans Lagoen, pa cuminsa, cu ta cay bou di maneho di FPNA.