Home » Exitoso congreso di riñon na beneficio di e pashentnan

Exitoso congreso di riñon na beneficio di e pashentnan

Tremendo cooperacion entre nefrologonan di Hospital y ImSan

by Admin
0 comment 76 views


 

Tabata mas o menos 11 aña pasa cu a tuma luga e ultimo congreso di nefrologia riba nos isla. A pone man hunto atrobe y e aña aki ONA (Organisacion di Nefrologonan Aruba) a tene un congreso grandi di nivel halto pa tres dia di diferente orador local y internacional. Un congreso interactivo y sumamente importante mirando e desaroyonan riba tereno di nefrologia y e balor agrega pa keda na altura pa brinda cuido di calidad na pashentnan. “Tabatin hopi informacion interesante danki na e diferente oradornan. Ademas, participantenan por a haci pregunta y oradornan a trece diferente ‘caso di pashent’ pa dilanti cu por a discuti. Mi ta hopi orguyoso di ful e team cu a logra organisa e congreso aki di un nivel di kita sombre,” asina Jacco Vroegop, director di Horacio Oduber Hospital (HOH) a expresa. 

 

Topiconan interesante

E organisacion ONA ta conta cu diferente specialista nefrologo di HOH como tambe di Instituto Medico San Nicolas (ImSan) esta presidente Mauro Cuba, secretaria Hardjit Kharagjitsing y miembronan Agustin Garcia Sanz, Ali Garcia Marquez, Maria Vargas y Romeo Kock. Hunto nan tabata encarga pa trece oradornan cu a papia riba diferente topico interesante. A logra trece dies orador internacional pe congreso y uno cu a duna su presentacion di forma virtual. A intercambia diferente informacion tocante di riñon entre otro: presion, importancia di uza data, biopsie, transplante di riñon, diferente malesa cronico di riñon, tratamento, prevencion y tambe diagnostica pa detecta malesa di riñon na tempo.  

 

Binti aña di transplante di riñon

Ademas di tur e topiconan ya caba menciona e specialistanan a dedica extra atencion na e topico di transplante di riñon. Ta conmemora cu 20 aña pasa a tuma luga e prome transplante di riñon pa un pashent Arubiano den exterior. Pues un bunita momento pa corda riba tur esfuersonan haci pa realisa e oportunidad cu esaki a trece pa pashentnan di Aruba. Durante e ultimo añanan a sigui desaroya e proceso y a yuda mas pashent. Durante e congreso a lansa video unda algun pashent cu riñon nobo ta expresa nan storia y nan gratitud. Alabes a tuma un momento durante e congreso pa gradici y reconoce e dedicacion di dokter Romeo Kock pa e 20 aña di dedicacion cu’n bunita plakaat.  “Mi ta hopi orguyoso di mi team di nefrologia y dialisis cu e logro bunita aki, y specialmente dokter Kock pa su pasion pe trabou”, Jacco Vroegop ta expresa. 

 

Cooperacion y evaluacion 

Joel Rajnherc, director di ImSan, a felicita ONA pa e tremendo congreso organisa despues di hopi aña. Rajnherc a expresa cu cualkier congreso di e nivel aki, cu presencia di oradornan experto mundialmente reconoci, ta duna specialista y otro participante local e oportunidad di evalua unda nan ta para den terapia pe pashentnan di Aruba. Comparti informacion, conocemento y experiencianan ta di inmenso balor den cuido medico. Ta importante pa remarca con un cooperacion entre ambos instituto ta duna su fruto na bienestar di e pashentnan. Joel Rajnherc a comenta cu den Caribe e problemanan di riñon ta hopi grandi. Aruba hasta ta den e top 10 di mundo y esaki no ta algo bon, pasobra ta algo cu por wordo evita. Pues, un congreso asina aki ta esencial pa nos isla pa mehora e cuido pa nos pashentnan y alabes enfatisa e importancia di prevencion. 

 

Un gradicimento ta bay na tur sponsor local y internacional pa haci e congreso aki realidad. Gratitud tambe ta bay na tur orador, team di ONA y team completo pa e trabou duru pa por a logra haci e congreso aki posibel. E congreso ta un tremendo ehempel di colaboracion medico entre HOH y ImSan. Sin un colaboracion extensivo e congreso lo no tabata uno asina fructifero. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio