Home » Cas di Cultura ta fortifica su lasonan local y internacionalmente

Cas di Cultura ta fortifica su lasonan local y internacionalmente

by Admin
0 comment 94 views

Recientemente Cas di Cultura, Aruba su teatro y plataforma cultural, a bira miembro di e prestigioso  “Vereniging van Schouwburg- en Concertgebouwdirecties” (VSCD). VSCD ta e asociacion profesional  di establecimentonan di teatro y concierto na Hulanda. Desde 1947 e asociacion aki ta traha pa  establece un posicion fuerte pa e sector di arte di tarima na Hulanda y den Reino Hulandes riba tereno  financiero, politico y denter di comunidad en general. 

Como organisacion cu ta trahando den e industria di arte y cultura, VSCD ta sostene su miembronan  door di ofrece nan diferente herment cu ta haci nan trabao diario mas facil, incluyendo beneficio y  descuentonan special riba training y educacion. VSCD su meta principal ta pa conecta diferente  establecimento den Reino Hulandes cu otro y ta stimula su miembronan pa intercambia  conocemento cu otro. 

E miembresia ta un honor grandi pa Cas di Cultura, mirando cu Cas di Cultura ta e prome plataforma  den Caribe Hulandes cu a ricibi e oportunidad aki y ta den pleno preparacion pa su renobacion. E  experticio y sosten cu Cas di Cultura lo ricibi for di VSCD y su miembronan sigur lo ta beneficioso y lo  yuda Cas di Cultura den e proceso pa garantisa fondo for di instancianan di arte, cultura y teatro  renombra den exterior. 

E renobacion di Cas di Cultura ta esencial pa por sigi brinda nos comunidad un bon servicio, no  solamente como teatro, pero como centro cultural completo. Den cuadro di esaki, directora di Cas di  Cultura, sra. Vicky Arens, a presenta e plan di renobacion na Parlamento di Aruba, hunto cu colega  sra. Evita Marchena cu ta na encargo di Cas di Cultura su recaudacion di fondo y presidente di e Hunta  di Supervision di Stichting Schouwburg Aruba, sr. Carlos Tapias. E Parlamentarionan presente a  mustra hopi interes den e vision pa futuro di Cas di Cultura.  

Cas di Cultura ta forma un parti importante di nos herencia cultural. Cu su 65 aña di existencia, e ta  keda e unico teatro proscenico den henter Caribe y ta brinda oportunidad na un cantidad incontabel di artista, artesano, scolnan, maestronan di scol, musica, teatro, canto y baile y practicamente ta  aporta na tur sector creativo. E necesidad pa proteha y sostene e plataforma principal di cultura na  Aruba ta evidente. E team di Cas di Cultura ta trahando duro y ta spera cu comunidad di Aruba henter,  incluyendo sector priva y publico, por brasa e proyecto aki pa logra e meta di renobacion hunto. 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio