Wayaca – Diamars merdia algo prome cu 1’or y mey un Honda Pilot a bolter ariba e caminda grandi, tegenover di e parkeerplaats di Airport. Na prome instante a papia cu lo tin hende pega den e auto, pero ta parse cu esey no tawata e caso.
Ambulance y polis tawata bastante lihe na e sitio, y a constata cu tin muchanan tambe envolvi. Tur hende tawata na tino.
Pero, e manera con e vehiculo por a subi e muraya di beton na banda di caminda, a laga tur hende boca habri. Un velocidad halto probablemente tawata e causa, otro posibilidad ta cu e chauffeur por a bira malo tras di stuur tambe.
Pues den e auto tawata tin dos adulto y dos menor cu ta mustra cu a caba di wordo busca di skol.
Varios ambulance a presenta pa atende cu tur e heridonan y despues di a stabilisa nan a sali direccion Hospitaal.
Polisnan di trafico a presenta pa haci e investigacion necesario.
