En conexion cu Dia Internacional di Hende Muhe diabierna 8 di maart, Lider di MEP Evelyn Wever-Croes, den nomber di Partido MEP ta organisa un encuentro na CEDE di MEP na Santa Cruz.

E dia aki ta wordo conmemora rond di henter mundo pa concientisa riba e importancia pa empodera muhernan den tur tereno, pa asina nan por empodera y apoya otro. Igualdad di genero ta e desafio mas grandi actualmente den materia di derechonan humano y e progreso di e hende muher ta un factor cu ta beneficia henter e humanidad. Riba e dia aki no solamente ta celebra tur derechonan cu ya muhernan a logra, sino sigui demanda tur cu falta pa alcansa. Tur hende muher por ta un lider y asina apoya otro pa logra esaki tambe.

Durante un anochi di Wine & Cheese partido MEP lo celebra e Dia Internacional di Hende Muhe e aña aki. E orador pa e anochi aki lo ta psicologo Antoniette Geerman y e topico ta “Positive Mindset”. Tur esnan interesa por registra via un scan di QR Code of via e link riba e pagina di Facebook di MEP.

Lider di MEP, Evelyn Wever-Croes ta gradici Shannon Henriquez y comishon di actividad cu un biaha mas ta organisa e evento grandi aki y ta invita tur muhernan fuerte, inteligente, poderoso y talentoso pa bin celebra hunto e dia grandi aki na CEDE di MEP.