Home » A.T.A. ta Patrocina Evento di Colombia Fintech Cu Orador Principal Su Alteza Real Reina Máxima

A.T.A. ta Patrocina Evento di Colombia Fintech Cu Orador Principal Su Alteza Real Reina Máxima

by Admin
0 comment 136 views

 

 

Cu hopi orguyo, Aruba Tourism Authority a forma parti di un evento significativo den e mundo di Fintech na Colombia. E evento cu ta titula “Pagos Para Inclusión Financiera” a tuma luga dia 28 di februari na Bogota y tabata tin como invitado special y orador principal S.A.R. Reina Máxima. Reina Máxima ta Embahadora/Representante Special di E Secretario General di Nacionnan Uni cu ta para pa Inclusion Financiero y Desaroyo. 

 

Den e funcion aki, Reina Máxima ta haci uzo di su bos pa trece concientisacion na diferente aspecto relata na inclusion financiero. Entre otro, Reina Máxima ta promove acceso y uso responsabel di servicionan financiero y ta sostene diferente accionnan pa inclusion financiero. Tur esaki den colaboracion cu sector publico y priva, tanto riba nivel mundial como riba nivel di pais.

 

E decision di A.T.A. pa patrocina e evento di Colombia Fintech ta basa riba diferente motibo importante y cu ta relevante pa Aruba. Naturalmente Reina Máxima ta un figura sobresaliente mundialmente y particularmente den Latino America, considerando su descendencia Argentino y cu e ta papia Spaño perfectamente. E evento ta permiti Aruba pa bolbe trece dilanti e vinculo cu Hulanda, comoparti di e reinado Hulandes. Esaki semper A.T.A. a refleha riba dje, ya cu Hulanda ta bon mira na e pais y ta duna un toke positivo na pais Aruba.

 

E participacion di S.A.R. Reina Máxima no solamente ta duna prestigio internacional na e evento, sino tambe ta percura pa cobertura amplio den medio di prensa nacional y internacional. Tur esaki ta duna Aruba un plataforma ideal pa aumenta visibilidad pa nos destinacion y nos producto turistico. 

 

Aruba, siendo un isla bisiña di Colombia, semper ta wordo reconoci como un socio importante y  e participacion di A.T.A. na Fintech Colombia ta enfatisa e colaboracion y relacion estrecho entre e dos paisnan. 

 

Durante e evento, e ekipo A.T.A. tabata presente pa conecta cu diferente participantenan, kendenan ta figuranan prominente den e mundo financiero na Colombia y otro paisnan cercano. Como sponsor, Oficina di Turismo lo ricibi aceso na database di tur e participantenan, cu lo wordo inclui den e strategia di comunicacion (ECRM) pa asina participantenan por keda na altura di tur loke Aruba tin di ofrece.

 

Tocante Aruba Tourism Authority (A,T.A)

Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e e modelo di “High Value-Low Impact” cu ta para pa un balans entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balans menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio