Home » No tin motibo pa alerta Aruba, no tin brote di Dengue

No tin motibo pa alerta Aruba, no tin brote di Dengue

by Admin
0 comment 106 views

ARUBA- Departamento di Salud Publico di Aruba DVG a tuma nota di un informacion cu a wordo publica pa consulado Mericano ubica na Curaçao cu ta importante pa nos coregi. E comunicado emeti ta haci un yamado di “alerta” pa outbreak di casonan di dengue den Caribe referiendo na diferente islanan manera Curaçao, Aruba, St Maarten (CAS) y tambe islanan Bonaire, St Eustatius, Saba (BES).
Como Departamento di Salud Publico di Aruba encarga cu vigilancia di malesanan infeccioso y malesanan transmiti pa sangura nos kier informa comunidad di Aruba cu e informacion aki mencionando Aruba como isla experenciando “outbreak” di dengue ta incorecto. Na Aruba no tin brote di dengue na e momento aki. Ta importante pa ta informa cu Dengue ta un malesa endemico cu durante henter aña tin casonan sporadico y DVG ta monitorea e situacion local/ regional y mundial y ta actua mesora pa evita cu e casonan ta sigui subi. Mester remarca cu for di Juli 2023 World Health Organization a informa tur su miembronan cu Dengue por bira un problema mundial teniendo na cuenta e cambio climatologico. Door di esaki conhuntamente cu otro isla nan den Caribe Hulandes a enforza e vigilancia riba malesanan transmiti pa sangura.
Dato nan di e seccion di Epidemiologia y Investigacion ta mustra cu den e ultimo luna di 2023, DVG a ricibi 13 notificacion di Dengue di cual 5 a wordo comproba, 6 a sali negativo y 2 caso a wordo registra como probable. Pa aña 2024 tin 6 notificacion haci pa Dengue, di cual 2 a sali positivo, 2 negativo y di 2 caso nos ta pendiente resultado di laboratorio. Compara cu aña nan anterior, esaki no ta diferente. Indice nan di control di GKMB tambe ta mustra esaki y hospital no tin ningun caso di admision door di Dengue te cu awor aki.
Pa medio di e comunicado aki Departamento di Salud Publico kier infatisa cu Aruba no tin un “alerta” pa casonan di Dengue y den cualkier caso di un malesa cu ta un menasa pa salud publico Departamento di Salud Publico di Aruba (DVG) ta e instancia oficial pa informa comunidad debidamente.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio