ORANJESTAD—Diabierna mainta 16 di februari, Prome Minister Evelyn Wever-Croes y algun otro colega minister a ricibi algun studiante di Colegio EPI. Motibo di e bishita di e studiantenan hoben tawata pa haci un entrevista cu diferente minister en conexion cu preparacion pa un presentacion pa e vak Burgerschap.
A bin varios pregunta dilanti principalmente riba e tereno di calamidad entre otro con ta prepara un comunidad ora tin un calamidad specialmente e parti di e comunicacion. Hunto cu e dirigentenen di Crisis Management Office (CMO) kendenan a atende via zoom, Gobierno a contesta e preguntanan y a brinda informacionnan necesario cu lo yuda e studiantenan cu nan estudio y presentacion pa e vak Burgerschap.
Prome Minister a remarca cu tambe a refleha bek riba e temporada di e pandemia di Covid19, con bon Aruba tawata prepara p’e y esey a prueba cu structura di crisis di Aruba ta funciona bon. Despues di pandemia a sigui mehora diferente di e procesonan y awor ta miho prepara ainda pa cualkier calamidad.
“Tawata hopi bunita pa mira e gran interes di e studiantenan y nos a ofrece nan nos cooperacion pa nan presentacion di otro siman y a desea nan hopi exito”, Prome Minister a expresa.