ORANJESTAD: Diahuebs ultimo, den un esfera ameno na Centro di Bario Dakota a tuma luga bautismo di uniform nobo di ekipo di Dakota. Minister Endy Croes a pasa pa saluda y felicita ekipo di Dakota cu nan uniformnan nobo di Division di Honor pa e temporada 2023 -2024 di playoff di futbol. Minister Endy Croes ta gradici e patrocinadonan cu ta sostene e deporte di futbol y ekipo di Dakota. Mandatario di Deporte a indica cu el lo sigui aporta pa yuda deporte den su totalidad.
Sr. Carl Michael Bikker a indica cu Centro di Bario Dakota y e organisacion di futbol a reconoce y gradici e patrocinadonan pa nan gran aporte, paso pa mantene un organisacion firme bo tin mester di yudansa. Danki na e patrocinadonan a logra cumpra uniform y material pa e muchanan por train. Ademas di esaki, a comparti e vision y plan di Dakota. Tambe, Sr. Bikker den nomber di directiva di Centro di Bario Dakota a gradici Minister Endy Croes pa su apoyo y pa aporta na nan organisacion. Sr. Bikker a enfatisa cu semper cu Centro di Bario Dakota acerca e mandatario de Deporte pa un yudansa, nunca el a duda y semper a yuda. Alabes, Sr. Bikker ta gradici Minister Endy Croes pa su empuhe pa yuda Centro di Bario Dakota. Pronto lo inaugura un di e canchanan di basketball di mas bunita di Aruba.
Por ultimo, Minister Endy Croes ta desea e ekipo di Dakota hopi exito den e playoff di futbol cu ta inicia e weekend aki. Cu deseo, dedicacion, determinacion y disciplina ta logra. Exito!