Diabierna, dia 16 di februari 2024, mi ta cumpli 30 aña ta dedicando mi tempo na trabounan boluntario como Escritor y Historiado. Nunca mi por a pensa cu e lo a tene mi asina druk y creando un carera asina largo. Pero e apoyo y satisfaccion cu mi ta ricibi continuamente, ta haci mi mucho mas consciente cu tur loke mi ta haci pa e futuro generacion ta hopi importante y necesario Esaki indudablemente ta tuma hopi sacrificio y dedicacion. Pero mi ta hopi agradecido na tur esnan, y tambe Reino cu a mira e importancia di mi trabou pa nos pais y nos futuro generacion. Pa ricibi un Lid na 2006; Ridder in de Orde van Oranje Nassau y Laureat den Zilveren Anjer na 2022 y tambe wordo selecta como e unico condecorado pa aperece den e website di Kanselarij der Nederlandse Orden ta algo pa aprecia. Danki na un y tur cu a contribui.
Tabata na aña 1994 cu mi a cuminsa investiga nos historia, cu mi a topa cu un amigo y colega, Sr. Don Gray y su esposa Lisa Gray cu a lanta den Lago colony. Diariamente nos tabata den contacto, especialmente loke ta concerni e guera. Door di esey tambe, Don a bin cu un link U-156/U502 Roundtable cu mi tabata contribui cu hopi articulo di interes. Nan ta biba na Jupiter, Florida y tin dos timeshares cu ta permiti nan bin Aruba tur aña. Dia 26 di februari 2010 Don ta fayece y ami a yuda e famia prepara un programa pa asina nan por bin pa strooi shinishi di e defunto, pa cumpli cu su deseo. Esaki a sosode na top di Seroe Colorado den presencia di e famia y invitadonan. Ainda nos tin bon amistad cu Lisa y e y famia ta sigui bin Aruba.
Den e trabou aki mi a siña hopi, a sera hopi bunita amistad, a pasa momentonan hopi agradabel, specialmente yudando nos hobennan cu nan werkstuknan di scol. Duna charla na scol y organisacionnan, entrevista, scirbi buki tabata un placer. Pero a lo largo tur esaki ta birando poco dificil pa mi por complace, debi na mi edad y responsabilidadnan. Mi ta haya masha hopi peticion/invitacion cu mi no por cumpli cu tur, pa motibo cu mi ta tratando tur manera pa evita di core auto na un larga distancia y tambe evita pa sali anochi. Trafico a bira hopi pisa y peligroso awendia. Asina ta, lo mi tin cu bay analisa e situacion y avisa ki decision mi lo bay tuma. Mientrastanto ban sigui traha pa nos dushi pais. Danki pa e comprension. Saludos.
Dufi Kock
Escritor y Historiado
12 di februari 2024