Home » Prome Minister Evelyn Wever-Croes: CRISIS MANAGEMENT OFFICE A ENTREGA VEILIGHEIDSPLAN ARUBA CARNAVAL 2024 NA PROME MINISTER

Prome Minister Evelyn Wever-Croes: CRISIS MANAGEMENT OFFICE A ENTREGA VEILIGHEIDSPLAN ARUBA CARNAVAL 2024 NA PROME MINISTER

by Admin
0 comment 85 views

 

Diamars 30 di januari Crisis Management Office (CMO) a haci entrega di e Veiligheidsplan Aruba Carnaval 2024 (Plan di Siguridad di Aruba su Carnaval) na Prome Minister Evelyn Wever-Croes.

Pa prome biaha Aruba tin un Veiligheidsplan Aruba Carnaval. Esaki a wordo traha door di CMO hunto cu SMAC caminda tur grupo di carnaval a participa. Den a plan ta stipula e palabracionnan haci riba diferente aspecto di siguridad pa tur carnavalista. Cada lider di e gruponan a reuni individualmente cu CMO y a firma e palabracionnan y asina garantisa e siguridad di participantenan y tur esnan cu ta contribui cu carnaval.

Minister President a expresa di ta contento di por wak cu tin palabracionnan haci riba e tema di decibell. Akinan a palabra con halto e sonido di e bandanan por ta den paradanan di carnaval. Pa paradanan di mucha e maximo ta 90db y e muchanan mester ta 7 meter leu di e speaker y mester tin earplugs bisti. Tanto Gobierno como CMO ta di opinion cu mester protege muchanan di dañonan permanente na nan oido y na nan salud. Pa loke ta trata adultonan cu ta participa den un forma voluntario y ta responsabel pa nan propio actonan, e maximo ta 120db. 

CMO ta haci control durante tur parada a base di e palabracionnan di e Veiligheidsplan y por bisa cu te awor practicamente tur banda a tene nan mes na e maximo di e sonido y durante parada di mucha 95% a uza earplugs. 

Prome Minister a felicita CMO, KPA, SMAC, DTI y gruponan cu a forma parti di e plan aki y a cumpli cu ne. E intencion ta pa durante tres aña traha cu e plan aki pa tur evento publico, di mas di 2000 hende y despues adapta unda mester y finalisa e plan.

Aparte di esaki durante paradanan CMO a pone un “hospital on the field” cu ta pa duna asistencia na tur cu ta participa y acudi na e carnaval y asina por alivia nos Hospital Horacio Oduber y nan por sigui cu nan asistencia normal. 

“Cu esaki Aruba un bes mas ta duna ehempel den nos region di con ta atende cu siguridad di su ciudadanonan durante eventonan grandi. Y ya drentando simannan final di nos carnaval, Gobierno y CMO ta urgi tur banda y grupo pa cumpli cu palabracionnan haci y pone interes di nos carnavalistanan na prome luga”, Prome Minister Evelyn Wever-Croes a remarca.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio