ORANJESTAD – Drentando e siman pa cu celebracion di Dia di Betico, Prome Minister Evelyn Wever-Croes ta continua cu su bishitanan na scol. Dialuna mainta a toca turno na Colegio Sagrado Curason na Savaneta. Durante su bishita, Prome Minister a bishita Klasnan 6A y 6B, cu a duna un bunita presentacion di e dia special aki. E alumnonan a cuminsa nan presentacion cu un video di tur loke Betico a haci den su bida, sigui pa un presentacion sumamente bunita y emocional, cu Prome Minister a indica di a causa un gran impresion riba su persona.
Prome Minister a expresa di ta sumamente contento pa mira con hopi e alumnonan aki sa di e bida di Betico, y di su banda a splica nan cu Betico, ora e tabata tin nan edad, tambe tabata tin e deseo y soñonan cu cada un di nan tin awe, y cu ta na grandi el a logra cosnan grandi pa Aruba.
Na su turno cabesante di scol Juffrouw Lillith Rasmijn a indica di ta sumamente contento, y ta gradici Prome Minister pa bishita nan scol, y pa duna e alumnonan di klas 6 un bunita presentacion.
“Mi ta gradici e cabesante di scol, e docentenan di klas 6 Juffrouw, Carolina, Juffrouw Charlotte, y Juffrouw Michelle pa un mainta super interactivo, y tur e alumnonan pa un bunita presentacion. Mi ta sumamente orguyoso pa wak con prepara cada alumno ta, y ta spera cu cada un di nan tambe por logra, mescos cu Betico, cosnan grandi pa pais Aruba,” Prome Minister a expresa.
