Un acuerdo extra special, den antesala di Weganan Olimpico Mundial
Durante un conferencia di prensa na Oficina di Comite Olimpico Aruba, Ronella Croes – CEO di A.T.A. hunto cu Wanda Broeksema – Presidente di C.O.A. y Nicole Hoevertsz – Secretario General di C.O.A. a firma pa asina formalisa un acuerdo 2024-2025 como parti di un asociasion exitoso. Esaki ta nifica cu A.T.A. ta duna sosten pa cuater aña consecutivo, for di aña 2022 te cu 2025, na formacion di atletanan local.
Pa cuater aña consecutivo, A.T.A. ta duna sosten na C.O.A. pa identifica y prepara atletanan local cu tin e potencial di representa Aruba den eventonan local, regional, y internacional. Caminda cu e atletanan ta fungi y briya como embahador di Aruba na eventonan y riba plataformanan grandi y reconoci. Alabes, A.T.A. ta reconoce e avance positivo den nos atletanan actual cu ta logrando logronan excitante pa Aruba. Atletanan cu ta un ehempel y stimulacuion na otro atleta of futuro atleta pa demsotra cu soñonan por wordo realisa segun empeño y determinacion.
E meta principal como A.T.A. pa cu e acuerdo aki ta pa promove y posiciona Aruba internacionalmente y pa atrae e bishitante desea. Pa es motibo aki tambe ta ofrece sosten na eventonan Deportivo cu A.T.A. a bin ta patrocina di por ehempel, Aruba High Winds, KLM Marathon, Aruba Beach Tennis Internacional, y mas. Cada un di e eventonan aki ta brinda e oportunidad na nos bishitantenan y primordialmente na nos atletanan local pa competi na un nivel halto.
Hunto cu esaki, na final di 2023, A.T.A. a bin ta traha riba un investigacion pa asina por determina kiko ta locual cu mester ahusta na e maneho anual di evento y patrocinio. Un investigacion cu a conta cu participacion di 70 diferente partido den e mundo di entre otro deporte, pa asina por haci e strategia di A.T.A. aun mas skerpi conforme metanan nacional.
A.T.A. ta considera cu ta di suma importancia pa keda brinda sosten financiero na C.O.A. pa sigui asegura impacto y cobertura fuerte pa Aruba. Un di e coberturanan aki lo ta durante di e Weganan Olimpico 2024 cu lo tuma lugar entre 26 di juli 2024 y 11 di augustus 2024 na Paris. Weganan Olimpico cu lo conisti di mas di 10,500 atleta, 206 Comite Olimpico Nacional, cu ta inclui Aruba, 329 evento cu lo consitsi di 28 deporte y 4 deporte adicional. Un evento cu lo conta cu un cobertura mundial di un total di 3 biyon televidente cu lo mira Aruba presente. Esaki sigur ta forma parti di e strategia di mercadeo general pa engrandece e marca y reputacion di Aruba como un destino turistico.
Ta di subraya cu oficialmente Aruba ta conta cu 3 atleta cu lo representa e isla durante di e Weganan Olimpico 2024, mientras cu otro atletanan ta pendiente pa ricibi resultado pa un posibel clasificacion. Algo cu ta duna A.T.A. gran satisfaccion y orguyo ta cu por claramente mira e inversion y sosten cu a bin ta haci den formacion di nos atletanan local cual ta haci cu e patrocinio continuo cu C.O.A. y nos atletanan ta duna su fruto.
A.T.A. ta gradici y felicita hunta di C.O.A. y tur envolvi pa tur esfuerzo y e bon trabou cu a bin ta haci durante e ultimo añanan pa cu e desaroyo positivo di e atletanan local.
Por ultimo, A.T.A. ta felicita y desea hopi exito na nos atletanan cu a bin ta briya grandemente y tambe esnan cu pronto lo ta compitiendo na un nivel regional, internacional, y mundial. Aruba ta cu boso!