ORANJESTAD: Diaranson mainta, Minister di Enseñansa y Deporte Endy Croes a reuni cu e cabesantenan di scol di Dienst Publieke Scholen (DPS). Tambe presente na e ocasion aki, tabata e management team di DPS y staf di Ministerio di Enseñansa. Durante e reunion a contesta diferente inkietud di e cabesantenan y a trata diferente punto di agenda encuanto enseñansa, entre otro, BVVD, ambtsjubileum, invalster, maestro di guia, structura di cuido, dia di compensacion y profesionalisacion pa docente. Minister Endy Croes a informa e cabesantenan cu tin un comision cu ta consisti di profesionalnan di Departamento di Enseñansa Aruba, Inspeccion di Enseñansa Aruba y representantenan di tur schoolbestuur, unda hustamente ta trahando riba e puntonan aki. A palabra cu pa e luna di februari mester ricibi un conseho final di e comision aki pa asina implementa e plan y vision nobo augustus 2024. Tambe a informa e docentenan cu pa profesionalisacion di docente a introduci e plataforma digital Matrix, unda por sigui diferente curso online y na final di e curso ta haya un certificado. Fuera di esaki, a firma un acuerdo recientemente cu Center for Teaching Excellence di University of South Carolina, cual ta brinda nos docentenan di Aruba e oportunidad di ricibi les online di e docentenan di e universidad aki. Esaki sigur ta otro logro grandi cu ta beneficioso pa nos docentenan di Aruba, unda cu nan por sigui crece, profesionalisa y desaroya nan mes. Por ultimo, e mandatario di Enseñansa a elabora den linea grandi riba e trabounan cu a realisa pa enseñansa di Aruba y e trabounan cu ainda ta den ehecucion. Un tremendo reunion, unda a brinda tur informacion necesario na alrededor di 20 cabesante di scol di DPS. Finalmente, Minister Endy Croes ta indica cu el a ricibi un reaccion positivo di e cabesantenan y ta desea cu e aña aki por sigui traha hunto pa e progreso di enseñansa di Aruba den su totalidad.