ORANJESTAD: Recientemente, Premio Excelencia den Deporte a reconoce Sra. Marcela Kock pa su contribucion valioso den e desaroyo di deporte di Aruba. Sra. Kock ta bin di un famia di deportista. Su carera deportivo a cuminsa na un edad hoben y el a practica e disciplina di futbol, softball, basketball y volleyball. Cu 18 aña Marcela a cuminsa hunga softball cu ekipo di Plymouth Coca Cola. Hunto cu ekipo di Plymouth el a conkista varios titulo di campeon den e disciplina di softball. Tres biaha Sra. Kock a participa cu ekipo di Plymouth Coca Cola den e Copa Antiyano, dos campeonato a tuma luga na Curaçao y un na Aruba. Sra. Kock ainda ta activo den softball. Actualmente, e ta fungi como pitcher di Sweet Devils y ta hunga hunto cu su yiu, sobrina y nieta. Un anecdota cu Sra. Kock a comparti ta cu su ruman homber mas chikito ta fungi como su manager. Ademas di esaki, Sra. Kock a hunga varios aña futbol cu diferente ekipo. E conseho cu Marcela ta duna tur deportista ta pa nan tin disciplina. E disciplina ta tur cos pa bo por logra den deporte y pa semper tin respet y amor pa e deporte. “Sigui semper dilanti, haci bo deporte y bisa bo mes mi kier y mi por”, Marcela a expresa. E mandatario di Deporte ta gradici Sra. Marcela Kock pa su contribucion den desaroyo di deporte di Aruba y pa pone nomber di nos pais briya den exterior. Por ultimo, Minister Endy Croes a otorga Sra. Marcela Kock e reconocemento Baluarte den Deporte. Masha pabien!