ORANJESTAD: Recientemente, Minister di Enseñansa y Deporte Endy Croes a haci un bishita oficial na John F. Kennedy Education Center Aruba, unda cu a reuni cu e directora Anne-Marie Proveyer y henter e team di Directie Onderwijs Aruba. Minister Endy Croes a duna un discurso deseando nan un aña 2024 fructifero y a indica cu e aña aki lo sigui traha riba recomendacion 1, 2, 3, 6, 9, 10 y 11 di e Doorlichting van het Arubaanse Onderwijsbestel. Durante e ocasion special aki, a brinda cu druif pa duna inicio na un aña 2024 exitoso. Ademas, Minister Endy Croes a sorpresa e team di Directie Onderwijs cu e gran noticia cu nan Formatie Rapport y Instellingbesluit ta aproba. Desde aña 2017, Directie Onderwijs a haci un peticion pa haya aprobacion di nan Formatie Rapport y na aña 2021 cu Minister Endy Croes a tuma encargo di Ministerio di Enseñansa, nan peticion mas halto riba e lista tabata e Formatie Rapport. Pues, Minister Endy Croes a traha hopi duro riba esaki y final di aña 2023 a haya un conseho positivo di Departamento di Recurso Humano (DRH). December aña pasa, Minister Endy Croes a presenta e Formatie Rapport na Conseho di Minister y esaki a keda aproba. E mandatario di Enseñansa a sorpresa tur empleado y staf di Directie Onderwijs cu nan Formatie Rapport y Instellingsbesluit ta aproba y ta valido desde 1 di januari 2024. Esaki ta nifica cu e departamento lo sigui profesionalisa, crece y yega na 83 empleado den e structura nobo. Esaki sigur tabata un gran noticia pa e team completo di Directie Onderwijs. Minister Endy Croes a desea nan un bon aña 2024 den nomber di Gabinete Wever-Croes II y a haci un apelacion pa sigui traha hunto den team e aña aki pa logra tur e proyectonan di enseñansa.