Despues di aprobacion di Conseho di Minister di Reino
Despues di negosacionnan entre Aruba y Hulanda, Gabinete Wever-Croes II a logra adapta e Ley di Supervision Financiero di Aruba cu e normanan financiero nobo y tres condicion cu Hulanda a stipula. Segun e protocol di 2015 entre Aruba y Hulanda, Aruba no por cambia e ley aki di su mes pero prome cu esey, mester aprobacion di Conseho di Minister di Reino. Fin di augustus di e aña aki, Aruba a manda e concepto di e ley Hulanda y despues di negosacionnan intenso entre Aruba y Hulanda, Aruba a adapta e concepto riba e tres puntonan cu Hulanda a exigi.
Finalmente, Secretario di Estado Alexandra van Huffelen, dia 1 di December 2023 a indica cu ta bay di acuerdo cu e concepto adapta y e ley a wordo manda pa Parlamento. Dia 18 di December, Parlamento di Aruba a trata e cambionan aki cu a wordo aproba unanimamente pa e 19 Parlamentarionan cu tawata presente.
NORMANAN FINANCIERO: Den e ley adapta tin tres norma cu ta wordo stipula.
- Aruba tur aña mester tin por lo menos 1% di surplus.
- E gastonan di personal den 2027 mester yega maximo 10% di GDP.
- E debe di pais Aruba mester yega 70% na aña 2031 y 50% aña 2040.
Esakinan ta e normanan cu Aruba y Hulanda a palabra ya caba na 2018 y na 2020 y awo esakinan ta ancra legalmente. Prome Minister Evelyn Wever-Croes a indica cu e normanan aki ta realistico. E siman aki, Parlamento a aproba Presupuesto 2024 di Pais Aruba cu un surplus di 1%. Na 2023, e surplus tawata na 1.9%. Cu esaki, Aruba ta e prome pais den Reino cu tin un Presupuesto 2024 aproba y cu un surplus.
BOETERENTE, 6.9%:
Apesar di e echo cu Aruba a adapta e Ley di Supervision Financiero segun e intruccion di Hulanda, pa Hulanda, esaki no ta motibo ainda pa baha e boeterente di 6.9% pasobra segun Hulanda, Aruba ainda por cambia e ley aki unilateralmente y esaki no ta duna suficiente confortabilidad na Hulanda. “P’esey Hulanda a exigi cu Parlamento di Aruba ta pasa su autonomia Parlamentario na Reino y ancra esaki den un ley di Reino (Rijkswet). Parlamento di Aruba ta opone esaki”, Prome Minister a remarca.
Prome Minister a expresa cu e posicion di Hulanda den esaki no ta corecto. Esaki tambe a wordo demostra door di un opinion legal cu un profesor Hulandes a duna. Aruba ta mara na e protocol di 2015 y no por cambia e ley aki unilateralmente.
Tambe, expertonan ta bisa cu asina e boeterente di 6.9% di Hulanda no por keda na vigor tampoco awo cu Aruba a haci tur loke cu Hulanda tawata kier den e ley. Tambe Parlamentarionan di Eerste Kamer ta di mesun opinion.