Durante e di 6 edicion di End of Year 2023, a otorga premio na e mucha-, hoben-, y adultonan atleta cu a sobresali e aña aki.
ORANJESTAD: Diasabra ultimo, Minister di Enseñansa y Deporte Endy Croes a acudi na e di 6 edicion di End of Year Award 2023 organisa pa Aruba Runners Foundation. E evento deportivo aki a tuma luga Balashi Beer Garden, unda cu a otorga premio na tur e coredonan cu a destaca e aña aki. Durante e celebracion aki, Minister Endy Croes a duna un discurso felicitando tur mucha y hoben atleta y a haci entrega di medaya. Ademas di esaki, a otorga premio na e adulto-, grupo- y instancianan cu a sobresali e aña aki. Minister Endy Croes ta felicita Sr. Rammy Ramada y ful e team di Aruba Runners Foundation cu e tremendo evento aki, alabes ta felicita tur e coredonan cu ta eherce e deporte aki cu hopi deseo, disciplina, dedicacion y determinacion.
