Hopi hende a inscribi pa biba e experiencia di nan bida: tres aña biahando rond mundo desde e comodidad di un crucero, na prijsnan cu ta rivaliza cu esunnan di un bida normal.
Pero awor e soño a caba pa e pasaheronan cu a apunta pa e biahe inaugural di tres aña di Life at Sea Cruises. Despues di varios siman di silencio, e compania a admiti na e pasaheronan cu nan no tin barco y a cancela e salida, primintiendo duna e placa bek na esnan cu a registra nan nomber den e biahe crusero cu tabata costa miles di dollar.
Den un principio, e crucero tabata geschedule pa sali for di Istambul, Turkia, dia 1 di november, pero poco antes di e fecha ey, e salida a wordo aplaza pa 11 di november y traslada pa Amsterdam, Hulanda y luego pa 30 di november, atrobe for di Amsterdam. Pero 17 di november, menos di dos siman prome di e tercera fecha di salida, nan a informa e pasaheronan cu e crucero ta cancela.
Algun di e pasaheronan cu a reserva e 111 camarote bendi ainda ta na Istambul, pasobra nan a yega prome cu e fecha di salida original. Otro ta bisa cu nan no tin unda pa bolbe, pasobra nan a bende of huur nan cas prome cu nan biahe mundial y ya nan a deshaci di nan posesionnan.
Mayoria a gasta decenas di milliard di dollar den loke tabata supone di ta nan experiencia di bida, y awor nan ta enfrenta cu un periodo di espera di por lo menos varios luna pa por recupera nan placa.
E empresa a declara cu nan lo efectua e reembolso den plasonan mensual, cuminsando mitar di december y completando e pago na fin di februari. Tambe nan a ofrece di paga e alohamento te cu 1 di december y e biahe di regreso na cas di tur esnan cu a keda pega na Istambul. Pero algun di nan ta bisa cu nan no tin un cas pa bolbe.