NASA a revela e ultimo imagen capta pa Telescop Espacial James Webb, unda ta mustra un parti di e centro denso di nos galaxia cu un detaye nunca mira prome, incluyendo caracteristicanan cu astronomonan ainda tin cu splica.
Den un articulo, NASA ta detaya cu e region di formacion di streanan, yama Sagitario C (Sgr C), ta na un distancia di mas o menos 300 aña luz for di e buraco petro supermasivo central di Milky Way, Sagitario A*. “Nunca tabatin dato infrared den e region aki cu e nivel di resolucion y sensibilidad cu nos ta haya cu Webb, asina nos ta mirando hopi caracteristica aki pa prome biaha”, e investigador principal di e tiem di observacion, Samuel Crowe, un studiante universitario na Universidad di Virginia na Charlottesville, a detaya segun locual NASA a publica.
Ademas, den e articulo ta indica: “Webb ta revela un cantidad sorprendente di detaye, dunando nos e oportunidad pa studia e formacion di streanan den e tipo di ambiente aki di un manera cu prome no tabata posibel”. “E centro galactico ta e ambiente mas extremo di nos Milky Way, unda teorianan actual tocante formacion di strea por wordo someti na e pruebanan mas riguroso”, Profesor Jonathan Tan, a añadi, un di e conseheronan di Crowe na Universidad di Virginia.