Home » A.T.A.: A Inspira Futuro Lidernan durante e Trent Shelton Motivational Conference

A.T.A.: A Inspira Futuro Lidernan durante e Trent Shelton Motivational Conference

Como parti di esfuerzo “Voices of Tourism” 

by Admin
0 comment 227 views

 

 

 

 

Diabierna mainta, Aruba Tourism Authority (A.T.A.)  a yama bonbini na mas di 500 studiante di Universidad di Aruba, EPI y EPB kendenan a bini hunto den e sala di Renaissance Convention Center pa atende e culminacion di campaña “Voices of Tourism” cu un presentacion motivacional di presentador internacional, esta Trent Shelton. E campaña a carga como meta pa inspira e proximo generacion di lidernan den e industria di turismo.


E conferencia a habri cu un discurso di Ronella Croes, CEO di Aruba Tourism Authority, kende a reflexiona riba e rol importante di profesionalnan den e industria di hospitalidad. Ta pa medio di nan dedicacion, pasion y trabou duro cu nos por crea experencianan excepcional pa nos bishitantenan. Croes a comparti un mensahe inspirativo cu e hobennan, esta pa nan acepta nan storia unico y pa uza esaki pa construi un futuro cu nan por ta orguyoso di dje. “Den un industria cu ta balora colaboracion, conocemento propio, pensamento critico y comunicacion efectivo, e biahe no ta trata solamente di logronan academico, pero di crecemento personal, liderazgo y crea un impacto positivo y duradero riba mundo” tabata palabranan di Croes.  

 

A.T.A. ta reconoce e tarea importante di sigui inverti den profesionalnan turistico y particularmente nos futuro generacionnan. Pa e motibo aki a invita autor y presentador renombra Trent Shelton pa empodera y inspira e futuro lidernan. 

 

Durante e conferencia, Sr. Shelton a comparti un combersacion poderoso tocante balor propio. A pone enfasis riba e e tres reglanan fundamental, esta pa compronde bo balor intrinsico, practica compasion cu bo mes y cultiva autenticidad. E principionan aki ta vital pa logra yega na bienestar mental y emocional, cu ta hermentnan importante den desaroyo personal y profesional. 

 

E mensahe di Sr. Shelton a resona y a wordo bon ricibi pa tur presente. Por a conta cu un sala di studiante hopi atento y comprometi pa e palabranan ofreci, cu a resulta cu algun studiante por a comparti nan storia personal y asina ricibi conseho impactante. Ta di menciona cu e conferencia di diabierna mainta a wordo publica ‘live’ pa tur e 12 miyon siguidor ariba red social di Sr. Shelton. Cual ta nifica cu e evento aki a ofrece un gran motivacion pa hubentud y adultonan local presente, alabes a conta cu un bunita promocion pa Aruba.

 

Durante di estadia na Aruba, Sr. Shelton a cumpli cu bishita tanto na ekipo femenino di futbol di SV Britannia y studiantenan di Mon Plaisir College pa asina provee palabranan di motivacion. 

 

A.T.A. ta mira bek na un mainta sumamente positivo y inspirativo. A.T.A. lo sigui dedica na mehoracion di industria di turismo di Aruba, tanto pa nos bishitantenan como tambe, studiantenan, y nos profesionalnan den e mundo di hospitalidad. 

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio