Home » Prome Minister Evelyn Wever-Croes: Cu e nombracion di señora Zulema Dabian-Erasmus

Prome Minister Evelyn Wever-Croes: Cu e nombracion di señora Zulema Dabian-Erasmus

by Admin
0 comment 205 views

 

 

 

GOBIERNO CONHUNTAMENTE CU E MINISTER PLENIPOTENCIARIO NOBO, LO SIGUI TRAHA NA FORTALECE E LASONAN ENTRE ARUBA Y MERCA 

 

ORANJESTAD – Durante conferencia di prensa di Gobierno di Aruba, Prome Minister Evelyn Wever-Croes a anuncia cu e siguiente Minister Plenipotenciario na Washington lo ta señora Zulema Dabian-Erasmus. Despues di a elabora riba con e procedura pa scohe un Minister Plenipotenciario nobo a bay, duna un introduccion chikito riba su cualidadnan cu a conduci na un decision na su fabor, y a splica e importancia di e posicion aki, Prome Minister a pasa palabra pa señora Dabian- Erasmus, pa asina e por duna un splicacion mas amplio di su mes y di su plannan. 

 

Señora Dabian-Erasmus a indica di ta sinti su mes honra cu e oportunidad di por sirbi su pais como e siguiente Minister Plenipotenciario na Washington. Pa su persona y pa su carera profesional, e oportunidad aki ta uno hopi grandi. Señora Dabian-Erasmus a studia e ramo di “international relations”, na Rijks Universiteit Groningen. Na 2005, el a bolbe Aruba y a eherce diferente funcion como “ambtenaar” di Gobierno di Aruba den e ramo di relacionnan exterior.Tambe el a splica, e importancia cu e oportunidad aki tin pa su famia y mayornan, cu di chikito a siñe pa semper traha duro pa e por logra yega unda mi kier yega. Semper nan a siñe cu e mester ta orguyoso di unda e ta bin y pa ta semper responsabel pa su famia, y siguiendo e consehonan aki semper, awe cu e nombracion aki, e lo por traha duro y ta responsabel pa su pais. 

 

Señora Dabian – Erasmus a indica cu, manera Prome Minister a menciona, e relacion entre Aruba y Merca ta hopi importante, y pesey el lo traha duro pa sigui fortalece e lasonan cu tin, pa asina yuda e desaroyo economico y e seguridad na Aruba. Tambe el lo sigui enfoca riba e oportunidadnan cu Merca ta brinda e studiantenan, di Aruba, pa asina nan tambe por caba nan estudio y tin un miho futuro. 

 

E ultimo añanan señora Dabian-Erasmus a labora na Departamento di Asuntonan Economico, pa Gobierno di Aruba, specialmente pa Minister Xiomara Maduro y Minister Geoffrey Wever. El a splica cu durante e tempo ey, nan a traha pa conecta e “business community” cu oportunidadnan den region. Awor, como e Minister Plenipotenciario nobo, e ta sumamente enthusiasma di por traha mas di serca cu Embahadora Tazelaar, y Jocelyne Croes cu ta e directora di Buitenlandse Betrekkingen, cu ministernan di Gabinete y directornan di diferente departamento gubernamental, riba temanan importante pa pais Aruba. Tambe el a expresa e importancia di por vocifera Aruba su cultura y balornan.  

 

Mundo ta pasando den temponan insigur, cu e elecionnan na Hulanda y Merca cu ta den porta, y e guera cu ta andando. Pesey ta importante pa Aruba tin representacion den e foronan internacional, pa asina keda altanto di culakier desaroyo rond mundo y pa por tuma accionnan na tempo. 

 

“Mi ta cla pa siña tur locual mi tin cu siña , pa asina traha na bienestar di mi dushi pais. Mi ta sumamente honra di a wordo escohi pa representa Aruba como e Minister Plenipotenciario nobo, y mi ta gradici na Gabinete Wever-Croes II, pa cu e nombracion aki” tabata palabranan di señora Dabian Erasmus. 

 

Prome Minister ta gradici señora Dabian-Erasmus pa acepta e posicion importante aki, y a indica di ta sigur, cu den su persona, Aruba lo tin un bon representante, y cu pronto, Gobierno y pueblo en general, lo wak resultadonan positivo y beneficioso pa pais Aruba. Tambe, Prome Minister ta desea señora Zulema Dabian -Erasmus tur clase di exito pa cu e funcion nobo aki. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio