ORANJESTAD, Aruba 8 di November 2023: Parlamentario Ricky Hoek a duna di conoce cu ta keda scucha y wak den medionan di comunicacion cu Mike Eman, cu su actitud di ‘Monkey See Monkey Do’, atrobe a bay haci bishita na VNO y tambe a subi avion pa bay Hulanda, na momento cu Prome Minister a bay Hulanda.
Ta cuestiona kico ta e idea di Mike Eman, kende a bisa cu e a biaha pa Hulanda pa bay trece pensamentonan nobo y mas constructivo. Den opinion di Hoek, sr. Eman lo mester cuminsa trece su pensamentonan constructivo prome cerca Parlamento di Aruba caminda e ta estableci y caminda cu e ta traha. Banda di esaki Eman ta bisa cu mester trece alivio den e situacion na Aruba y e relacion cu Reino.
Situacion na Aruba ta progresando y ta bayendo den bon direccion y cu e relacion cu Reino, cu Prome Minister Evelyn Wever-Croes aworaki tin, ta mas miho cu nunca compara cu tempo cu sr. Mike Eman tabata Prome Minister di Aruba, a bisa. “Cu su actitud di sinta bou di un palo y no tuma accion, mi ta kere e no a pone Aruba den ningun luz positivo e tempo ey, compara cu awe cu sra. Evelyn Wever-Croes a bay Hulanda y a haci bishita na tur instancia ta muestra con serio nos gabinete ta. Ta muestra con cualifica nos Prome Minister ta y cu e por haci un bon trabao”, Rick Hoek a remarca.
Mike Eman version 2.0: Manipulacion cerebral ta sigui
Parlamentario Hoek kier pa Sr. Mike Eman y pueblo mes tambe corda cu mester ta consciente di loke ta e wega y e manipulacion cerebral cu sr. Eman ta treciendo atrobe. Esaki ta e Mike Eman version 2.0 caminda cu e ta bin cu informacionnan pa purba manipula pueblo. Sinembargo, tin e resultadonan den e rapport “Bo Aruba” di su prome experencia di tempo cu e tabata prome minister.
Riba e topico di minimumloon, e Parlamentario a indica cu Eman ta keha cu salario minimo no ta suficiente na Aruba. MEP a aumenta entrada y poder di compra ora cu a hisa ‘minimunloon’ 4 biaha durante Gabinete Wever-Croes I y II.
Pa esnan cu ta kere ciegamente loke Mike Eman ta bisa, Gobierno di MEP a traha y ta trahando pa e pensionadonan nan bienestar. Lo por haci mas, pero esaki ta bay segun progreso economico-financiero manera Gabinete Wever-Croes II ta haciendo. Pa di prome, MEP a aumenta pensioen di biehes tres biaha y esaki ta hopi mas biaha y un suma hopi mas halto di loke Mike Eman mes a haci durante di su gobernacion.
Pa di dos, a aumenta ‘reparatietoeslag’ cu Afl. 45 florin pa asina yega na e suma di Afl. 170 florin pa luna pa e pensionadonan. Pa di tres, a baha ‘grondbelasting’ di e pensionadonan. E plan di impuesto 2023 ta baha e peso fiscal pa e pensionadonan y akinan por wak cu e suma liber di impuesto ta subi te cu 30 mil florin pa aña y a separa e cobransa di impuesto di pensioen di pareha di SVb. Pero tur esaki si Mike Eman ni OPPA ta trece dilanti. Ta djis pa laga parce cu nada ta wordo haci pa nos adultonan mayor.
E Parlamentario a finalisa bisando “Shonnan sea alerto. No cay den manipulacion cerebral di Mike Eman. Gabinete Wever-Croes II ta haciendo un bon trabao. Nos ta bayendo den pasonan positivo, nos ta progresando poco poco”.
E version 2.0 di Mike Eman, ta ripiti mesun cos. Pa mas informacion concreto riba e maneho financiero desastroso di Mike Eman por busca e rapport “Bo Aruba” di Algemene Rekenkamer Aruba riba www.gobierno.aw. Tur cifra a keda publica y asina por haci comparacion cu loke Sr. Eman ta bisa y loke e la haci.